原來白蟻對於地球寶寶好重要，佢哋扮演好多角色，人類亦都有好多思想行為應該要向佢哋好好學習！隨時N年後，你多謝返佢都嚟唔切！
原因1: 成為人類嘅cute cute朋友，而唔係做敵人
都市人咁忙，又充滿壓力，梗係要睇返啲cute cute嘢去放鬆下啦！睇完蟲蟲特工隊，望住啲蟻真係覺得佢哋好打耳，係人類嘅朋友，而唔係敵人！
原因2: 令到死樹都可以動L起返身
白蟻係少數可以分解木纖維嘅生物，所以佢哋可以化腐朽為神奇，將啲死咗嘅樹變返成泥土，等到所有嘅養分可以循環不息！依加社會好多時都鼓吹用有機泥土，而唔用科學泥。如果蟻可以重新俾多次機會啲枯萎咗嘅樹木，等佢哋都可以為環保出返一分力，真係好好！
原因3: 將泥土變成吸水大笨象
港鐵故障香港人都識摸黑過隧道行路軌，白蟻都識自己整條隧道俾自己行架，條隧道仲可以令到啲水份吸晒入去泥土嘅底層，變成吸水大笨象！
原因4: 沙漠化？乜東東？
佢哋咁鬼勤力，搬咗咁多水份入泥土，令到無晒水嘅地方，都變到勁生猛！所以好多植物都因為咁樣，可以喺原本好乾嘅地方重新生返出嚟！將乾旱之地變成「蟻巢綠洲」！沙漠化？無晒啦！地球嘅未來靠晒佢哋啦！
原因5: 佢哋好有愛
佢哋其實超聰明，亦都好有愛！大蟻會保護細蟻，而如果大蟻發生意外，例如掉咗落水，細蟻亦會齊心咁救起隻大蟻。佢哋齊心合力嘅精神好值得我哋去學習，喺重要關頭互相依賴，而唔會只顧個人利益，拍下屁股走人！
原因6: 佢哋好有部署、有系統，亦靠競爭去得到王位
佢哋隻隻蟻都會聽蟻后嘅指令，如果蟻后死咗，佢哋會靠競爭好似打交咁去得到領導之位！所謂能者居之，邊個有能力就可以有更多權力，人同白蟻一樣道理。
原因7: 追求成果，亦都適時進退
一塊樹葉對佢哋嚟講好大塊，所以佢哋一定會搬走塊葉之前剪斷塊葉。但佢哋唔會好似我哋咁用鉸剪，而佢哋會好有系統咁分配工作。有啲會用佢哋嘅腳割斷塊葉，有啲會負責用身體hold住塊葉，亦都有啲會負責喺剪斷過程完咗之後接住塊葉。另外，亦都可以發現佢哋好多時都會做自己能力範圍之內嘅嘢，能前進亦都適當時退後，等自己可以做到自己想做嘅嘢之餘，亦都唔會將自己放喺危險之中。如果人類都可以咁做，小編相信工業意外都可以減少，以至唔會失去咗咁多無辜嘅生命。
原因8: 佢哋係玩機動遊戲嘅高手
佢哋係唔會受到地心吸力影響，一旦佢哋隻腳吸住一件物件嘅表面，佢哋點倒豎蔥都無問題！能屈能伸，不計較環境變遷，只著重自己要變得遇強越強！
原因9: 佢哋係山泥傾瀉拯救部隊
白蟻好有團隊精神，佢哋平時會將啲食物呀、葉呀、石頭呀，放喺啲泥度，令到泥土唔下陷，亦都唔會鬆散。山泥傾瀉永遠消失！落完雨佢哋又會即刻去做嘢，真係小編都忍唔住想講句：「放鬆啲啦你哋！」
原因10: 佢哋係植物嘅速遞員
佢哋平時會透過走嚟走去，將水同氧氣帶到植物嘅根部，等到啲植物可以容易吸收到啲養分同埋水分！佢哋行動快，亦都唔介意好辛苦咁走嚟走去，生活節奏仲快過香港人！
原因11: 佢哋係昆蟲界嘅運動員
有研究查過蟻喺得到獵物之後，佢哋可以比平時行路速度快咗好多倍！所以佢哋做事真係好勤快，亦都好有效律！可能真係揾佢哋送pizza仲快過Pizza Hut。
所以以後如果見到有白蟻寶寶，唔洗咁急消滅佢哋架！可以逐隻逐隻帶返佢哋落啲泥度，又可以保護地球，又唔洗殺生！雙羸！
唔知你睇完之後又學唔學到成功戰略呢？
圖片來源：網上
撰文：Gloria Leung
