好多人都覺得毒L好悶、怕醜、唔識打扮又凈係識打機，同毒L 拍拖一定好無聊。不過最近有位好有先見之明嘅女網友，深明毒L好有可能係潛力股嘅道理，喺網上分享咗應該搵個毒L做男朋友嘅八大原因！
1. 供應量充沛
毒L單身嘅比例係比較高，相信大家身邊總有啲毒毒哋朋友係單身嘅。佢哋性格同外貌通常都冇咩問題，只係為人比較怕醜、內向、唔識同女仔溝通。如果心上人係毒毒哋嘅話，大家不仿試下主動出擊，話唔定真係一擊即中架！
2. 可以畀女朋友適當嘅自由
毒L會當女朋友如珠如寶，一定唔會迫妳做妳唔想做嘅事。而且當你需要私人時間時，只要帶男朋友去到電腦前，佢就好快會進入另一個世界，唔得閒理你。(註：如果你想佢理你時，同時係好難叫到佢離開電腦世界。)
3. 置裝費低
毒L唔太注重打扮，一件衫可以著一世，平時慳埋唔少錢架！而且你買衫畀佢時佢唔會「阿支阿左」，並且一定會好好珍惜。
4. 靚仔潛力股
其實好多毒L都係「靚仔潛力股」，一齊咗後女朋友們可以花啲心思改造下男朋友嘅衣著、外型，話唔定改造過後型到阿媽都唔認得！
5. 可以幫你解決電腦問題
所有同電腦相關嘅疑難雜症，只要妳問得出，問題大致上都可以搞掂。
6. 戀愛經驗少
毒L身邊都係男仔朋友多，冇咩機會同女仔相處。因為為人比較怕醜，所以戀愛經驗通常都比較少，戀愛中最可怕嘅前女友問題會比較少出現。而且佢對愛情唔會有先入為主嘅概念，你講咩佢都會信。
7. 真心、專一
整體而言，毒L專一嘅比例係比較高。佢哋為人比較怕醜，所以好多時唔會(或者唔夠膽)同其他女仔亂搞男女關係。而且佢主動追得妳，一定係好鍾意妳先夠膽出手。
毒L好多時都係真心對待身邊嘅人，所以女仕們，唔好玩弄人哋嘅感情啊！
8. 誠實
毒男好多時都唔識講大話，所以大家唔洗擔心畀男朋友呃。而且嘈交時，毒L男朋友好多時都會講出自己心底話，例如，佢會講:「我都唔明你諗咩！」聽到後妳當然會更嬲啦，不過佢之後會好老實咁講：「我真係唔知吖嘛，唔通要我扮知咩？（真心無辜樣)」
係嘅，其實拍拖前都你都知毒男唔了解女人心架啦，仲要見到佢咁誠實可憐，真係唔好意思嬲落去喇！而且就長遠發展嚟講，有咩咪開心見誠咁講清楚囉！
女仕們都要留意番而家有好多厹會扮毒L嚟溝女，大家要多多提防呢班偽毒啊！
