講到迪士尼卡通，好多人會諗起《白雪公主》，《美女與野獸》等等，而近年迪士尼都開始將經典卡通拍成真人版電影，好似《美女與野獸》就係今年拎到好好嘅票房，大受好評。而其中一部大家好想睇真人版嘅一定係《花木蘭》。
2015年，迪士尼購買左真人版花木蘭嘅劇本，宣佈會開拍，相信好多觀眾都好期待。而當年仲有人喺網上聯署要求迪士尼用返華人女星做木蘭去拍，擔心木蘭比人漂白左。迪士尼都公開招人去試鏡木蘭一角，終於過左三年，應徵者多達千人，迪士尼最終決定由中國大陸女星劉亦菲飾演花木蘭一角。
到底點解劉亦菲能夠突圍而出呢﹖我地先睇睇迪士尼開左嘅三大條件:
1.一定要有武術底子
2.可以講到流利英語
3.要係具有星味的華裔演員
講武術底子，劉亦菲一定有。拍過好多武俠片嘅劉亦菲，《天龍八部》、《仙劍奇俠傳》，《神鵰俠侶》等等，拍咁多點都學過唔少功夫。而且有消息指，劉亦菲一知道有花木蘭試鏡機會時，即刻走去特訓。睇黎佢都有曬準備。
英文方面，劉亦菲係美籍華人，細個同媽媽喺美國大，英文就一定唔差。網上好多劉亦菲接受英文訪問片段都見佢英文好好嫁。
去到「具有星味的華裔演員」呢點，有冇星味就見仁見智啦。不過，話曬係中國一線女星，樣又幾好，又有氣質，我就覺得劉亦菲都符合呢點。加上劉亦菲個樣都好有東方美，唔會話鬼鬼地ABC果種，做花木蘭都無問題。
今次劉亦菲拍到迪士尼大片，仲擔正做主角，睇黎好快劉亦菲都身價升十倍啦。
撰文:JJ WONG
