《西遊記》大家一定睇過，咁呢套偽西遊記大家又有無興趣？雖然《和遊記》只係播到第四集，但好多網民都話已經睇到欲罷不能，到底呢套新劇有咩吸引之處呢～
1. 完全估佢唔到嘅劇情
《和遊記》以《西遊記》劇情為主軸，雖然西遊記嘅故事大家都耳熟能詳，但《和遊記》就一反傳統，雖然角色設定相似，但劇情就無可能估到！小編就唔喺度劇透啦，有興趣就快啲開劇睇啦～
2. 兩大型男坐陣
睇劇除咗睇內容，男女主角顏值都好重要架～《和遊記》孫悟空由李昇基飾演，完全做到嗰種外剛內柔嘅感覺。而牛魔王就由車勝元飾演，佢嘅角色設定係想成仙而正在俢行嘅牛魔王，嚟到人間成為選秀節目嘅主持人。就咁聽個設定都覺得好搞笑，啱晒誇張風嘅車勝元啊！
3. 劇情緊張搞笑
《和遊記》入面大部份角色都係妖怪，而女主角就係睇到鬼嘅人類，所以套劇經常都會出現唔同嘅鬼怪，劇情緊張。但喺緊張嘅氣氛下，孫悟空、牛魔王同豬八戒又會成日做啲搞笑無厘頭事，令到成套劇即刻輕鬆晒～
成套劇總共有20集，每集大概90分鐘，趁佢仲未播得太多快啲開始睇啦！
圖片及資料來源：naver
撰者:Yee
