藝人陳喬恩4號酒駕被捕，雖然可以10萬台幣保釋，但就俾媽媽禁足，負面新聞亦不斷傳出，好多人都大爆佢為人大牌，仲浪費食物同明知故犯。
陳喬恩之前接咗電影《愛情大師的秘密行動》，但工作人員就大爆佢難相處。劇組為咗方便通常都會集體訂飯盒，但陳喬恩自己唔食但又要指定叫咩食，有時仲要指定叫邊間餐廳，令到工作人員都好麻煩。有次陳喬恩指定咗4款菜式，但食咗兩啖就唔要，非常浪費。
另外亦有次因為拍攝而包起間酒店，事前已經同咗陳喬恩講酒店全面禁煙，所以唔好喺酒店入面食煙。但最後都係俾酒店人員投訴，話成間房都係煙味，而且地下都係煙頭，好難清理。
其實之前已經有傳聞佢同吳宗憲主持《綜藝旗艦》時成身酒氣，但之後傳媒問返吳宗憲佢就不置可否。
唔知今次風波會唔會影響到陳喬恩而家喺大陸嘅一線女星地位呢～
圖片及資料來源:中時電子報，ETNEWS
撰者:Yee
