花生源於琴晚有位台灣小毒毒，好開心好幸福咁喺爆廢公社二館（即係爆料公社嘅分館，不過係非公開群組）同各位網友分享自己成功出POOL仲POST咗同女友嘅甜蜜合照!
嗱呢啲本來就係開心事黎嘅所以都引黎一班網友黎同歡唱齊慶賀架！點知花生就喺呢個時候大爆發喇！相中女主角被佢現任老公踢爆佢已婚仲有個小朋友啊！
就係咁，由於呢單實在太爆所以爆料公社小編直頭將兩個post組合埋一齊放去公開嘅爆料公社同大家一齊開心share，引黎兩萬幾人一齊追post！ 
有網民搞笑留言話呢單嘢就好似打牌果陣宣佈自摸點知原來自己小相公食詐糊一樣！
呢個時候，唔覺意比咗頂帽人地戴嘅男主角現身喇，仲好似好保護女主角咁，不過下面又即刻戴頭盔話自己唔知佢未離婚～
正當大家都以為係女主角唔啱之際～有位叫吳臭臭嘅網友自稱係女主角嘅閨蜜，指責戴咗綠帽果位老公原來成日打老婆，打到成日要去驗傷仲有驗傷單！
佢仲放咗兩張截圖，係女主角同佢老公嘅對話，呢張阿老公仲講到明離婚後唔會理個小朋友同隻狗狗...嗚啊小朋友同狗狗好可憐！
另一張就寫明佢地兩個會喺3月27號去搞離婚。
閨蜜睇黎真係好維護女主角，佢仲繼續留言叫網民唔好理人地嘅家事唔好亂講野，點知又比網民圍插喇。
仲比網友話佢係豬隊友越描越黑～因為未到3月27號即係未正式離婚但又公然放閃，上到法庭都係女主角理虧啊～
除咗女主角有閨蜜跳出黎之外，阿老公都有個親生阿哥跳出黎幫拖架！結果係咩？咪就係閨蜜同阿哥互片囉！
花生到而家仍然繼續開放，仲有大量網民表示好想獲批准加入爆廢二館緊貼追Post呀！
小編表示，我都好想入去爆廢二館食新鮮花生啊！！嗚！！！！
圖片來源: 爆料公社
撰文: Msrachel
