又到聖誕～又到聖誕～每年諗送禮物都諗爆頭，朱古力一定實無死！不過好多人來來去去都係買果幾個牌子，驚撞款又唔想諗？小編揀左幾款特別嘅朱古力禮盒，梗有一款岩你嘅！
英女皇御用朱古力品牌：Charbonnel et Walker
全世界英國皇室御用嘅品牌只係得四個，想試下連英女皇都鐘意食嘅朱古力，其實香港都有得賣！Charbonnel et Walker呢個牌子已經百幾年歷史，英女皇更加係佢地嘅常客，全因佢地每一粒嘅朱古力都係全人手製造，而英女皇最鐘意就係玫瑰同紫羅蘭兩款花味朱古力。
- 粉紅香檳松露朱古力禮盒 （$348）
Charbonnel et Walker最暢銷嘅一款，就係粉紅香檳松露朱古力。賣相高貴嘅粉紅色心形禮盒，加上入面由糖粉包住嘅松露朱古力，再滲出香醇嘅酒味，簡直係極致嘅享受！
- 英國國旗雜錦朱古力禮盒 （$348）
另外，Charbonnel et Walker亦有雜錦朱古力禮盒，入面仲有英女皇最愛果款玫瑰朱古力，入面仲要有玫瑰花瓣，每一啖都會充滿住玫瑰花香，正宗色香味俱全。
之前《Do姐去Shopping》都有介紹過，亦都忍唔到係咁試，就知無介紹錯喇！
銷售點：銅鑼灣Sogo 地庫 - Counter Premium
賭神周潤發大愛嘅朱古力：Feodora
當年發哥係《賭神》系列電影食朱古力一幕，相信唔少人都仲記得。連「賭神」都鐘意食嘅朱古力，到底係何方神聖呢？其實係德國限量出產嘅Feodora品牌。
Feodora超純滑嘅口感，全因為選用左全球產量只有5%嘅高品質可可豆，而且製作過程必須超過72小時嘅焙煮，仲無落防腐制，可以完美享受朱古力嘅幼滑。
- 德國Feodora朱古力六角形禮盒 （$128）
Feodora有分37%牛奶朱古力、60%純味朱古力同埋75%「正宗賭神」朱古力，梗有一款岩你嘅！（小編覺得37%牛奶真係甜到入心，超滑超好味，不過如果你朋友鐘意苦味朱古力，點可以錯過連賭神都大愛嘅75%呢？）
銷售點：銅鑼灣Sogo 地庫 - Counter Premium
意大利Gluten-Free朱古力：Venchi
無防腐劑、堅持採用全天然材料嘅Gluten-free（無麩質）Venchi朱古力，絕對係適合患有穀膠過敏症嘅人士食用。患有穀膠過敏症嘅人士會因為胃部無法消化穀膠又影響腸胃，不過Venchi就可以滿足你鐘意食朱古力嘅喜好喇！
意大利品牌Venchi已經有過百年歷史，多年來一直追求高品質嘅朱古力，亦希望唔同人士可以品嘗到精品朱古力嘅美味，所以佢地除左係Gluten-free嘅朱古力外，仲有「無添加糖」系列朱古力，連糖尿病人都可以享用！（當然亦需要向醫生查詢適當嘅食量）
Venchi嘅皇牌系列一直都好受歡迎，而呢款書型小禮盒就有牛奶榛子蓉夾心同焦糖夾心魚子醬朱古力兩款。每粒除左朱古力外型似魚子醬之外，其實外層嘅朱古力粒粒大有名堂，因為每粒都只係得3mm，人手製之餘仲包住7層朱古力，亦曾經得過意大利甜品界嘅最高榮譽—Vassoio D’Oro Award，認真不得了！
比利時皇室御用朱古力品牌：Leonidas
現任比利時國王菲利普指定Leonidas為皇室嘅朱古力供應商，正因為Leonidas堅持選用新鮮嘅材料，同埋多年來係同一廠房出產朱古力，然後以最快速度運送朱古力至世界各地，令唔同人都可以享用最「新鮮」嘅朱古力。
- Premium Christmas Gift Box （$480）
今年Leonidas推出左36粒裝聖誕樹禮盒，當中包括四款口味朱古力以及果仁軟心等口味，聖誕樹嘅造型為今個聖誕更添氣氛。
- Christmas Gift Box （$280/19psc, $480/40pcs）
唔想咁單調嘅，Leonidas亦有精選雜錦朱古力，入面嘅口味包羅萬有，好似焦糖、辣曲奇、杏仁等多款口味，再配上唔同嘅白、牛奶同黑朱古力，帶來多重驚喜。除左禮盒裝，亦可以自己揀選朱古力，製作獨一無二嘅聖誕朱古力禮盒。
銷售點：銅鑼灣Sogo 地庫 - Leonidas
圖片及資料來源：網上圖片/官方網站
撰文：食家牟尼
