就算未睇過套戲，應該都聽過下Annabelle嘅故事，世界上無奇不有，除咗Annabelle之外，其實周圍都有好多唔同嘅鬼娃娃，今日就同大家介紹其中幾個。注意：如果細膽嘅就唔好再碌落去啦，今晚發惡夢小編都無能為力……
Annabelle
一開始講返個大家都識嘅，培養下大家情緒～據講當初呢個公仔係由兩個學生Donna同Angie由二手店買返嚟，但成日出完街都發現佢會去咗其他位置，甚至曾經喺羊皮紙上留低信息。最後佢地就將公仔交咗俾專研究超自然現象嘅華倫夫婦，目前Annabelle就被安置喺The Warren's Occult博物館。
Robert the Doll
Robert係繼Annabelle後，公認為最恐怖嘅鬼娃娃！據講呢個娃娃係一個對黑魔法有研究嘅僕人送俾Robert Eugene Otto嘅禮物。一開始Otto會同娃娃對話，但佢父母以為佢只係同娃娃玩，但後來情況越嚟越嚴重，鄰居話見過娃娃由窗戶內往外窺視，會眨眼而且表情會改變，甚至有時夜晚會喺Otto間房喊，當父母趕到時佢房裡傢俬都會亂哂，而Otto堅持係娃娃做架！去到Otto死咗，另一家人接收咗Robert，佢哋個女話Robert每晚都出現喺佢間房，而且仲想殺佢！1994年Robert被捐到Fort East Martello Museum，鎖喺玻璃櫃裡展示到今日。
Mandy
無人知道Mandy點嚟，但佢最後一任主人就話成日夜晚都聽到喊聲，直至佢送咗Mandy俾哥倫比亞嘅博物館之後先再聽唔到。而Mandy去到博物館之後，博物館職員經常都話唔見咗啲食物，電器成日壞同紙張成日散落滿地。職員仲話見過佢傷害其他娃娃，係真係假就真係得當事人先知啦～
Okiku
Okiku係日本一個哥哥送俾妹妹嘅禮物，妹妹好鐘意呢個短髮著和服嘅娃娃，所以幫佢改咗個同自己一樣嘅名—Okiku。一年後，妹妹重病死咗，佢屋企人就放埋個娃娃上神壇。恐怖嘅係，娃娃嘅頭髮竟然愈來愈長！就算剪完仍然會繼續生長！Okiku而家放咗喺北海道嘅Mannenji廟入面，大家去北海道旅行嗰陣，歡迎去睇下。
Harold
Harold係第一隻被放到eBay上拍賣嘅鬼娃娃，當時好多超自然研究者都爭相購買。結果，好多買家都話帶咗Harold返屋企後，會見到佢對住佢哋笑，而見到呢個笑容嘅人，都會患重病或受傷。到底係巧合定真係Harold有神奇力量呢？咁就不得而知啦。
Amelia
Amelia同樣上過eBay拍賣，仲成為咗當時最高瀏覽嘅商品，到底Amelia有咩咁吸引人呢？
據賣家所講，當初佢買Amelia時佢Amelia對眼係藍色，但有一日佢對眼突然變成令人毛骨悚然嘅綠色！自此奇怪事就不斷發生……而最後買咗Amelia嘅買家就話佢親眼見過Amelia企喺走廊度，向住佢一路笑一路揮手。
到底係人嘅心理作祟，定係世界上真係有啲超自然力量？除咗以上呢啲，大家又有無聽過甚至遇過其他鬼娃娃？歡迎大家一齊研究研究……
圖片來源：網上
撰文：Kinnie
