【網購唔中伏】Instagram 購物攻略

Amber So 25 Apr, 2017


近年愈嚟愈多人轉移購物陣營喺Instagram 購物,貪佢平過街,而且唔洗去街都可以買嘢。不過正所謂:「騙徒手法層出不窮」,好多時都聽到有人話喺Instagram 買嘢畀人走數或者買到假貨。唔想自己成為下一個受害者?大家過數前可以留意以下六大攻略!


1. 粉絲人數同Like 數量係咪正常?
粉絲人數相信大家都知愈多愈好啦!不過而家都有啲IG shop 會買粉絲架!所以大家可以留意下會唔會有啲IG shop 粉絲人數同Like數量係唔成正比,會唔會有幾千幾萬個粉絲,但次次都係得幾個人Like 相。而且大家都要留意下粉絲同Like 相嘅人係咪真帳戶,如果好多都係嗰啲中東帳戶或者係非華裔人士嘅帳戶大家就知咩事啦!



2. 「便宜莫貪」
買嘢當然就愈平愈好啦!不過如果有IG shop 嘅貨品比其他同類型IG shop 賣得平好多嘅話就真係要小心啲啦!咁抵,唔通真係會有賣家覺得呢期賺夠,好想畀人賺下?少年,你太天真啦!


3. 貨物來源
有單當然就最好啦!不過如果冇單嘅話,落order 前不仿多口問句,問問店主「貨從何來?」如果店主話係喺原廠拎貨、次貨、識朋友有員工折嘅話大家就要「停一停,諗一諗啦」!


4. 有冇實景 / 實物圖?
會唔會有實物圖或者喺當地買貨嘅相?好多網店為咗提高顧客對自己嘅信任度,好多代購都會不時post 下自己喺當地入貨時嘅相。同埋睇下間IGshop 會唔會有店主自己影嘅實物圖 (有落水印),因為呃錢走數嘅IG shop通常只會喺網上載圖。



5. 有實體店 或 香港商業登記
搵喺香港有實體店或香港商業登記嘅IG shop 會較為可靠,起碼走數都有得追嘛!



6. 搵Google 大神
Google 一下,睇下會唔會有咩好評負評,或者上網出post問問網友。如果間IGshop 係有問題,網上一定有人唱衰佢。


上網買嘢有時係危險啲,不過只要小心睇清楚 ,花啲時間做下功課,絕對唔難搵到有信譽嘅 IG shop!


圖片來源 : Instagram


撰文 : Amber

聯 絡 我 們