【肥仔都係潛力股】泰男為溝女 減75公斤變「男神」

Amber So 09 May, 2017


好多人成日都話男人有錢自然就可以吸引到女人,傻啦!唔係個個睇錢嘅,因為好多人都係睇樣......(Sad but true)泰國呢位「才俊」28歲就已經係一間電話舖老板,錢係有啊,不過咁大個仔都仲係A0,點解?因為一年前嘅佢,體重足足有成155公斤!



泰國呢位名為Mos Sataporn 嘅網友由細到大都好鐘意食嘢,大個後體重更加直線飆升,高達155公斤。財運係有啊,不過感情路就唔係太順利啦,每次同女仔去完街都冇下文,咁大個仔都未拖過女仔。



有見及此,喺2016年5月1號開始,Sataporn 下定決心減肥,睇下可唔可以成功出pool!佢由平時每個星期食兩次Buffet,晚晚宵夜,改為每日食訂好嘅低熱量餐單加日日做運動。頭一個月食又冇嘢好食而且成日做運動做到好攰,Sataporn 真係好大壓力。佢曾經試過頂唔順,偷食零食,不過之後又強迫自己扣喉(大家唔好試啊!),幾經辛苦,堅持一個月嘅成果就係成功減走5公斤!



經過一年嘅努力,185cm高嘅Sataporn 成功減走差唔多半個自己,而家得返80公斤,成為正式嘅「高富帥」,果然肥仔都係潛力股!好多網友見到呢個成功嘅例子都大讚Sataporn 厲害,而且有好多女仔主動inbox佢,所以話呢,靚仔果然著數啲!




圖片來源:Facebook @ Mos Sataporn


撰文:Amber

聯 絡 我 們