人總會面對死亡，當死亡臨近時好多人都會後悔自己冇好好活著。一位照顧過好多臨終病人嘅紓緩科護士，總結出人死前最後悔嘅五件事。
Bronnie Ware 係一名澳洲紓緩科護士，專門照顧人生只剩下三個月嘅病人。喺平日同病人嘅相處中，佢總結出人死前最後悔嘅五件事。希望同大家分享嘅同時，大家可以好好選擇自己要走嘅路，到臨終時可以無悔地闔上雙眼。
1. 我希望當初可以活出自己嘅生活，而唔係符合他人的期待。
呢個係最常聽見嘅後悔。當人知道自己嘅人生要去到終結時就會清晰而沈痛地回顧自己嘅一生，然後就會發現，忙碌嘅生活令自己遺忘咗唔少夢想。到死前最後一段時間先會後悔點解自己要過於介意其他人對自己嘅睇法，唔勇於追夢。
2. 我希望自己唔好咁努力工作。
差唔多每一位男病人都講過呢句說話。佢哋瞓喺病床上會回想起無憂無慮嘅童年時光同埋會想起一眾兒時玩伴。好多男病人都表示好後悔自己花太多時間喺工作上，而忽視身邊重要嘅人。
3. 我希望我有勇氣表達自己嘅感受。
為免引起爭執，好多人平時都會隱藏自己嘅感受。醫學證明有好多心理及生理疾病都係同成日壓抑自己嘅感受有關。其實成日屈就自己，收埋自己嘅心事，只係會令自己唔開心，以及永遠都做唔到自己想要成為嗰種人。
4. 我希望當初與朋友保持聯絡。
你有冇向過身邊嘅朋友表達自己對佢哋嘅關心同愛？垂死之際，每個人都掛念陪自己笑過喊過嘅老朋友，會後悔點解唔花多啲心機及時間同朋友相處。
5. 我希望可以令自己過得更開心。
意外地好多人回憶起自己嘅一生都認為自己活得唔快樂。好多人唔願意去改變自己嘅生活，跨出Comfort Zone，就算唔開心都只係會叫自己忍。但當走到人生嘅盡頭時先知道，原來「快樂」係一種選擇，其實如果自己有勇氣走出自己嘅Comfort Zone，保證你會看見不一樣嘅人生。
自己嘅人生由自己控制，要對自己誠實，唔好令自己後悔，讓自己活出最精彩嘅人生。
圖片來源：
撰文：Amber
