唔係10月萬聖節先可以入鬼屋嘅，平時飲杯酒都可以同幽靈玩遊戲架～東京吉祥寺就有間叫做「遊麗」（日文「遊麗」同「幽靈」同音）嘅居酒屋，門外掛住一盞日式燈籠，仲播住啲孤魂野鬼發出嘅嗚鳴聲，夜晚就咁喺門口行過都驚啊！
叫得幽靈居酒屋，叫嘢食嘅方法梗係與別不同喇～每張枱都會有隻血手，只要揮下隻血手，就會有隻「女鬼」飄過嚟同你落單架喇～
如果嗰日係你生日，餐廳就會送腦漿造型嘅甜品俾你，等你食完可以安心上路。食完呢舊螢光綠物體，小編真係驚會中毒同大家講拜拜。
除咗呢舊奇怪生日禮物，其他食物都配合返餐廳主題，外形以恐怖為主。
唔好以為佢哋得個樣啊～網民食完都大讚好食架！最後俾埋啲實用資料大家先～
吉祥寺 遊麗 （きちじょうじゆうれい）
電話：050-5592-1406
地址：東京都武蔵野市吉祥寺南町1-8-11 B1F
時間：17:00～01:00
官網：yurei
圖片來源：Tabelog
撰者：Kinnie
