韓國71歲婆婆化身KOL 教化妝爆紅!

好多人以為做KOL一定要樣靚、身材好、或者要做嘩眾取寵嘅行為先可以吸引大眾目光,不過韓國呢位71歲嘅KOL 卻因為率直風趣嘅風格而於韓國爆紅!

呢位名為朴寞禮嘅71歲婆婆最近喺韓國相當受歡迎,個人youtube頻道「Korea Grandma」有超過29萬粉絲。到底佢係點樣開始佢嘅KOL 之路呢?原來一切都係因為孫女嘅孝心。話說朴婆婆家族有老人癡呆症家族病史,孫女擔心婆婆病發,為咗讓婆婆保留美好回憶,孫女辭工同婆婆一齊去澳洲旅行,並將當時為婆婆拍下嘅旅遊片段上載上網,意外爆紅!

爆紅過後朴婆婆開始拍攝更多類型嘅影片,由化妝、美甲、飲食、瑜伽、唱歌等等都有。成為一名Youtuber 過後,朴婆婆每日都好期待於鏡頭前表現自己,一方面可以做自己想做嘅事,而另一方面朴婆婆亦到重新搵到生活嘅重心。

朴婆婆受歡迎到連Vogue 都訪問佢。

朴婆婆無懼年齡限制,就算活到71歲都唔怕接受新事物,早前更加挑戰跳傘,生活多姿多采。難怪好多網友都表示好欣賞朴婆婆,希望自己去到70歲時都可以好似朴婆婆咁正面,咁樂觀!

圖片來源:Instagram @korea_grandma
撰文:Amber

DMC Firewall is developed by Dean Marshall Consultancy Ltd