夏日熱辣辣好熱好熱，小背心短褲真係夏日必備。想著衫著得好睇，少不免都要做運動同控制飲食，減肥真係好辛苦架！不過只要揀啱食物，減肥都可以食住瘦！
1. 紫菜
紫菜熱量低，又含有豐富纖維素、维他命a、b1及b2等有益營養素，可以幫助排走體內廢物及積聚嘅水分。不過同時間大家要小心選擇紫菜，因為好多紫菜零食都添加鹽或味精，小心愈食愈肥啊！
2. 秋葵
每年5月到9月都係秋葵旺季，其實秋葵好處好多，最特別嘅係秋葵當中嘅水溶性纖維及果膠可以阻礙腸胃吸收糖份，同時可以促進腸胃蠕動。熱量低又夠飽肚，減肥時唔怕食啊！
3. 香蕉
好多人以為香蕉好肥，減肥時唔敢食，係時候係香蕉平反啦！其實香蕉飽肚又低脂，係減肥嘅理想食物。雖然一隻中等香蕉大約有熱量110卡路里，比其他水果略為高，其實香蕉中嘅脂肪好低，而且營養相當豐富！香蕉含有豐富鉀質、維生素B6、葉酸等有益營養素，而且高纖維都是香蕉另一特色，纖維可以刺激腸臟蠕動，保持良好腸道健康。
4. 木瓜
木瓜中含有嘅蛋白分解酵素，能將體內嘅脂肪分解成脂肪酸，有效清除因吃肉類而積聚喺肚同下半身嘅脂肪。
5. 蕃茄
蕃茄好食之餘熱量又低，絕對係減肥嘅最好幫手！一個約200g嘅蕃茄熱量只有大概30卡路里，熱量比蘋果更低。蕃茄中嘅檸檬酸可幫助代謝糖分、燃燒脂肪，而番茄紅素可以促進體內代謝，吸收多餘脂肪。根據《美國臨床營養期刊》中嘅研究指出，連續8星期每日飲280毫升蕃茄汁嘅女性，腹部脂肪減少咗50%。
6. 竹筍
竹筍係天然低脂、低熱量嘅食品，每100g竹筍中就已經含2.1毫克蛋白質。除咗含有豐富嘅粗纖維外，更有助於抑制飢餓感。
7. 奇異果
奇異果每100g只有61卡路里，而且奇異果嘅膳食纖維比一般水果高，豐富嘅鉀質更有助控制血壓及排出多餘水分，絕對係減肥與營養兼顧嘅最佳選擇！
圖片來源：Internet
撰文：Amber
