恐怖漫畫家伊藤潤二5月2號開始喺小學館《Big Comic Original》展開《人間失格》漫畫新連載！而《人間失格》就係日本小說家太宰治嘅長篇小說作品，1948年5月12號完稿，同年6月13號就跳玉川上水自殺，所以《人間失格》係佢嘅告白，亦係佢嘅遺書。
「人間失格」即係喪失生而為人嘅資格。內容係自述從青少年到中年，都渴望被愛，主角為咗逃避現實而沉淪，喺迷惘中不斷自我否定，為咗抒發內心苦悶，歷經酗酒、自我放逐、自殺同用毒品麻痺自己嘅過程。主角亦喺腐敗嘅社會上見識各種虛偽嘅人類嘴臉，最終一步步走向毀滅。
小編睇小說個陣已經覺得好灰，成個人好抑鬱，今次仲要加埋伊藤潤二嘅畫風，相信一定可以將故事帶到另一個層面。
睇返暫時出咗嘅漫畫，色調就有少少恐怖，但暫時仲未睇到伊藤潤二一貫嘅恐怖畫面，可能都想尊重返原作者，所以唔會有太多改編。
《人間失格》係一個令人超級沉重嘅故事，份絕望感係會感染晒讀者。到底伊藤潤二會點樣用漫畫表達呢個故事呢？小編真係好期待啊！
圖片來源：網上、ビッグコミックオリジナル
撰者：Kinnie
