有無諗過麻婆豆腐都可以被卡通用嚟推出產品呢?喺原宿嘅SPINNS CAFE就同飛天小女警合作,以「中華」作為主題,推出期間限定嘅餐單。
" />
有無諗過麻婆豆腐都可以被卡通用嚟推出產品呢?喺原宿嘅SPINNS CAFE就同飛天小女警合作,以「中華」作為主題,推出期間限定嘅餐單。同西餐合作嘅卡通主題就聽得多,但喺中餐就好稀有啦,咁獵奇嘅野又點可以唔去試呢?
今次嘅主題係「中華」,店內都佈滿咗一鼓中華氣氛。除咗掛滿咗紅燈籠之外,仲有貼上揮春。
相信大家見倒都會覺得新奇嘅飛天小女警版麻婆豆腐,正中間會有主角花花個樣之外,仲有星星同心心形狀嘅配菜,可愛度直線上升。加上炸春卷同泡茶,就已經係一個完整嘅午餐。
炒飯就係配合泡泡嘅綠色形象,加入咗同樣係綠色嘅牛油果,唔知會唔會有另一番風味呢?之後仲有兩粒燒賣同紫菜湯,好似去咗酒樓咁。
而毛毛就用咗飯後甜品芒果布丁嚟代表,毛毛鮮明嘅黃色頭髮同芒果配色呼應。仲有真正嘅芒果果肉夾喺甜品入面,兩塊芒果就係毛毛嘅孖辮,十分形象化。
當你叫以上三種餐點嚟食嘅時候,仲會有特典嘅透明書籤送比你。每張書籤都有唔同嘅設計,鍾意飛天小女警既朋友睇嚟要食多幾次先可以集齊啦!
【詳情】
飛天小女警 x SPINNS cafe
期間:2018年6月22日至2018年7月22日
地址:東京都澀谷區神宮前1丁目15番2號神宮前115大廈3F
營業時間:11:00 ~ 20:00
撰文:Oliver Fong