《狂賭之淵》開拍第二季 繼續沿用首季演員

Oliver Fong 27 Aug, 2018


由河村Homura原作、尚村透作畫嘅人氣作品《狂賭之淵》,自動畫播出以來,主角蛇喰夢子嘅顏藝喺唔少觀眾心中留下深刻印象。動畫完結不久更加真人寫實化,由濱邊美波擔任夢子嘅角色。8月9日喺東京神樂座舉行咗一場電視版《狂賭之淵》Blu-ray&DVD售賣記念活動,濱邊美波、高杉真宙、森川葵、英勉監督都有出席。喺活動嘅最後宣布「season2」同電影版嘅制作同播放,引起全場氣氛沸騰。


三位演員與監督合照


三位演員同監督以作品入面私立百花王學園嘅制服登場,首先談及「season1」最深印象嘅場景。濱邊就選擇咗喺第七話夢子同芽亞里合作挑戰木渡嘅一幕,高杉就選擇咗自己演出嘅鈴井第一次參加賭博嘅第十話場景。反而森川就選擇咗無咁認真嘅一幕,夢子劇中因為輸咗要掛貓牌,扮貓嘅可愛舉動最深刻。


濱邊美波


森川葵


高杉真宙


活動亦都請嚟主題曲嘅演唱者巴山萌菜作為特別嘉賓登場,更加現場表演《一か八か》(孤注一擲)。之後加上現場三位演員,重現劇中第三話「雙重神經衰弱」遊戲。經過一輪苦戰後,儘管高衫有好好嘅表現,但最後都由一般參賽者快結束時大逆轉並取得了勝利。活動嘅最後宣布電視版會製作續篇,電影版亦都會喺同一季度上映。濱邊更加喺未正式宣布之前,因為太過想講呢個消息,中途傾計環節一度唔小心忍唔住漏口。


巴山萌菜


《狂賭之淵》講述以賭博強弱嚟決定全部嘅私立百花王學園,擁有” 狂氣” 同” 可愛” 反差特質嘅轉校生蛇喰夢子向學園內嘅秩序支配者不斷進行賭上人生賭博挑戰嘅故事。寫實版以濱邊美波為首,加上唔少有實力嘅演員,將原作嘅故事完整重現。


蛇喰夢子扮貓一幕


撰文:Oliver Fong

聯 絡 我 們