搵工幾乎係香港人必經階段！每日例牌係jobsdb漁翁撒網式咁SEND CV，大海撈針之下總會有唔少公司約你見工。唔知你有無試過明明無SEND過CV去呢間公司，但係佢又有你CV叫你見工呢？咁你就要注意以下幾點喇！
1. Keep Record - 所有工作申請記錄唔好刪
搵工apply嘅時候，通常都會有Application History或者email嘅record，記錄低你幾時apply，apply咩職位，用邊份cv同cover letter。唔好手快快就刪唒呢啲記錄，日後有公司打電話來約面試，你都可以跟住個record搵返自己有無send過cv俾呢間公司。
2. Double Check - 求職記錄同公司背景資料
好多人收到約面試嘅電話，傾好時間地點之後就無理過其他野。其實收到面試電話之後，應該先睇下自己有無apply過，再上網查清楚公司背景資料。好多時候你以為apply緊marketing嘅工，其實最後可能係做倫敦金、金融、保險、Cold Call，甚至係層壓式推銷。
3. Be Smart – 唔好俾佢帶你遊花園
如果你無公開自己CV係搵工平台，點解呢啲公司會有你嘅CV同個人資料呢？當你反問佢嘅時候，通常對方都會有Model Answer：「我地幫唔同公司搵人，職位都係Marketing Assistive，其實一樣嘅姐！」其實......佢無答你問題囉，而同時你就知道自己份CV應該俾人轉賣左出去，接下來就會有一堆公司叫你見工，而最終係福係伏就好難講喇！如果遇到呢啲情況，最好就當機立斷推左個interview。
4. Be Careful – 小心保管個人資料
唔少公司面試時，都會要求求職者帶埋學歷證明、過去工作證明同portfolio。但係如果要求你帶埋住址證明同銀行存摺，就要小心啲喇！通常正式請你，見工第一日先會需要以上嘅野，仲只係需要銀行存摺第一頁來自動轉帳出糧。工都未見成就要俾唒以上嘅野，就要小心保管好個人資料，或者問清楚要黎做咩。
5. Agent is Good? – 小心轉介陷阱
其實香港唔少獵頭公司都會幫各大公司請人，Agent有時候都會推介工作俾求職者。相對而言，求職者都算係多左求職機會，不過岩唔岩就真係見人見智喇！就算收到Marketing Assistant呢個職位嘅面試，最終可能未必係做Marketing。小編曾經有朋友收到三間agent打來約見工，明明係唔同公司，但係地址又一樣。呢啲時候，你就要小心係轉介陷阱，推介俾你嘅或者根本唔係Marketing工。
小編都遇過唔少求職陷阱，明明apply Marketing又變左做企街跑數嘅Sales、Cold Call sell基金/療程，又或者係賣保險！（如果你想做呢行咁作另作別論喇）所以搵工嘅時候，一定要事事小心，唔係到頭來又浪費時間、車錢。唔想做職場水魚，就記住以上幾點，咁樣搵工就會事半功倍！
圖片來源：網上圖片
撰文：專家Win神
