今年年初，日本扭蛋公司Panda’s ana首次出左「下巴突突」系列，一共有六款動物，包括獅子、虎鯨、熊貓、鱷魚、樹熊同狐獴。普普通通嘅話，又點會吸引到大批人去瘋狂扭蛋呢?全因為每隻動物嘅下巴都異常突出，唔少網友都話台灣出名「戽斗」(即台語中下巴較長的意思)嘅陳為民有新朋友喇~
不過，時隔一年都無，陳為民又有新朋友喇! 因為Panda’s ana啱啱就出左第二輪，再度延續爆笑「下巴突突」嘅神粹，而今次就有老虎、鯨魚、水牛、袋鼠、兔仔，仲連超治癒系嘅小刺蝟都有!
小編覺得今次最爆笑一定係袋鼠同刺蝟! 袋鼠媽媽同袋鼠BB都係一樣咁鮮明，咁出眾~另外小刺蝟亦好可愛，突突下巴仍然無損佢療癒人心，望住佢一定忍唔住笑~
呢兩日，唔少網民已經陸續Post咗佢哋嘅戰利品，仲加埋個同樣下巴突出嘅大叔係後面~
貓奴們亦都有特別嘅影相方法，就係叫主人配合下，一齊突出下巴~
已經有網民秒速抽好一套，成班一齊係天台曬月光同下巴!
不過代價可能係抽左好多水牛同老虎，先得一隻小刺蝟......啊! 小編要抽幾多隻先會有袋鼠同小刺蝟啊?
快啲集齊第一、二輪下巴突突系列，一家團聚喇! 千奇唔好錯過呢套令人爆笑嘅扭蛋啊，小編亦好期待佢會有第三輪:p
圖片來源：http://www.takaratomy-arts.co.jp/ Instagram - panda_no_ana/Twitter
撰文：陽光小毒毒
