壞習慣就人人都有，屋企同死黨或者會忍下你嘅，不過平時返工返學，啲小姐少爺脾氣同埋壞習慣就要收埋佢喇，如果唔係做左犯眾憎就GG喇! 以下小編精選咗日前訪問嘅內容，列出三大類嘅「犯眾憎」：
1. 「輕佻驕傲」無禮貌
「幫你係人情 唔幫你係道理」呢句，其實好多人都唔明白。如果你需要其他人幫手，千奇唔好一句「幫我做咗佢」彈埋去，好似老奉咁旨意人哋幫手。
其實講多兩句「唔該」、「麻煩你」、「Please」比起一句「幫我做咗佢」順耳得多! 就算人哋唔想幫，都會唔好意思拒絕你嘅拜託! 小編訪問娜姐同旦哥嘅時候，佢哋都異口同聲咁提到「最憎無禮貌嘅人」，仲要記住講多兩句「Please」!
2. 真．偽君子
「寧做真小人，莫做偽君子」呢句真係無講錯，小編訪問期間唔少人都會話最憎人假！譬如有啲人會笑笑口咁讚你，點知轉個頭又踩你一腳，仲要趁你唔喺公司或者行開行埋輕輕一篤，你個背脊都唔知俾人篤咗幾多下。
呢啲人真係聽到都知有幾乞人憎，畢竟山水有相逢，他朝君體也相同，就算唔攞個心出黎幫人，都唔好戴住個假面具害人!
3. 懶醒嘅阿茂
蠢，唔緊要。唔叻，無問題，最多咪俾多啲時間去教你幫你。不過，唔叻、又蠢，仲要覺得自己係曠世奇才，阿茂嘅朋友，我真係恭喜你啊!
雖然唔叻唔係罪，但係懶醒就係你嘅問題。唔好成為一言堂，以為自己諗嘅一定係最好最適合，其他人比意見你嘅時候，你需要嘅係認真聆聽，而唔係單純需要人哋對你意見嘅認同。否則你只會成為人哋食花生嘅對象，到時睇你點收科。
| {youtube}u0PSYDBtKgM{/youtube} |
小編希望2017年，你哋都唔會遇到以上提到嘅三大類人，又或者唔好成為「犯眾憎」嘅人! 日前小編實地訪問嘅片段入面，除咗娜姐同旦哥，仲有幾位娛樂圈新星同一眾市民，講下最憎邊類人，不妨睇下有無你最憎嘅果類人!
圖片來源：網上
影片來源：Ants Public - 攝/記：Sofia Lok/ msrachel
撰文：陽光小毒毒 & msrachel
