今年香港電影金像獎4月7日就會喺文化中心舉行喇！主辦單位剛剛公佈咗入圍名單，小編覺得以下幾個大獎絕對係爭崩頭呀！我地一齊睇下有邊套電影或者邊位演員有份角逐啦！
首先係最佳電影獎～排名不分先後，入圍作品如下：
1. 七月與安生
由香港導演曾國祥執導，陳可辛監製，改編自女作家安妮寶貝的同名短篇小說。
故事講述兩個由13歲開始就一齊玩嘅女孩——七月與安生的成長、情感經歷。
香港電影評論學會：「兩個少女的成長經歷，對應中國內地的經濟發展，富裕中若有所失的無力感。兩位女主角的演出火花四濺，曾國祥捕捉女性感覺尤其細膩，以香港人的身份拍攝內地題材，成績斐然。」
2. 美人魚
由周星馳擔任總製片、監製、編劇、導演的中國電影，最後以全球5.53億美元票房正式成為世界史上最高票房的非荷里活電影。
故事講述大富豪劉軒的地產計畫涉及填海工程，威脅靠海為生的居民。而單純善良的美人魚被派遣前往復仇，但交手過程中二人互生情愫，最終停止填海工作並為拯救人魚族，不惜與合夥人為敵。
3. 寒戰II
2012年電影《寒戰》的續集，由陸劍青和梁樂民繼續執導，故事延續上集的發展，講述警察與恐怖份子之間的角力。
香港累積票房超越6649萬港幣，超過2011年台灣青春片《那些年，我們一起追的女孩》，榮登香港史上華語電影票房冠軍位置。
4. 樹大招風
由許學文、歐文傑及黃偉傑執導，杜琪峯、游乃海監製，林家棟、任賢齊、陳小春領銜主演。故事改編自季炳雄、葉繼歡和張子強的真實犯罪案件。
講述1997年香港主權移交之年，當時三大賊王的犯罪經歷，反映在轉變之中，三人心緒如何遭受衝激。
呢部電影於第66屆柏林國際影展的新電影國際論壇首映，更係第40屆香港國際電影節的開幕影片。
5. 點五步
由陳志發執導，陳慶嘉及柯星沛監製，由廖啟智、林耀聲及胡子彤領銜主演。
故事改編自香港80年代初，首支華人少年棒球隊「沙燕隊」成立後，隨即於翌年擊敗日本隊伍，奪得香港少棒聯盟公開賽冠軍的真實故事。
呢部電影獲選為2016年第四十屆香港國際電影節的參展電影之一，行政長官候選人曾俊華亦有撰文推介架。
最佳男主角入圍嘅有：
1. 余文樂
余文樂喺呢部電影入面飾演一個患有躁鬱症的男人，余文樂拍完都話好難抽離角色，不過亦為余文樂帶黎首次角逐金像影帝嘅機會！
2. 吳鎮宇
今次吳鎮宇由19歲演到89歲，過程中要化妝減磅操肌，真係聽到都知有幾辛苦！不過今次入圍金像獎，令吳鎮宇本人都話得到一個超出理想嘅回報呀！
3. 梁家輝
梁家輝喺今集寒戰入面，繼續飾演李文彬，再度憑同一角色爭影帝寶座！
4. 任賢齊
小齊喺呢部電影入面飾演葉國歡，呢個角色改編自香港頭號通緝犯葉繼歡。但小齊就話睇好林家棟贏喎～
5. 林家棟
林家棟喺呢部戲入面飾演季正雄，改編自劫匪季炳雄。林家棟之前已經攞咗香港電影評論學會大獎最佳男演員，今次可以話係五個候選人入面，呼聲最高嘅一個！小編都睇好家棟攞呀！
最佳女主角都係一樣咁難估呀，以下五位你地又會選擇邊位呢？
1&2. 周冬雨、馬思純
相信呢兩個名字，今年大家都唔會陌生架喇～之前金馬獎同拍檔馬思純齊齊攞影后，唔知今次金像獎，兩位又分別再次入圍，唔知會唔會再下一城呢？
3. 鮑起靜
鮑姐今次飾演一個患上了黃昏症候群同埋末期癌症嘅媽媽，精湛演技感動唔少戲迷呀！
4. 湯唯
湯唯今次憑《北京遇上西雅圖之不二情書》再次入圍角逐金像影后，今次已經係佢連續第四年入圍喇！
5. 惠英紅
今次惠英紅飾演一名腦退化病人，佢話同佢媽媽好相似，所以都係依住媽媽黎演，小編入場睇呢套幸運是我嘅時候，都比佢感動到喊到眼都腫晒！
主角競爭激烈，配角嘅戰場亦都係烽火連連～我地先睇下男配角入圍名單！小編表示呢個真係最難分勝負，因為個個都好好戲！
1. 曾志偉
今次獎門人唔係獎門人，而係一個早年離家出走，後來又要照顧精神病兒子嘅爸爸！呢個劇本本來就需要大量內心戲，真係唔係個個演到架！
之前憑呢個角色入圍過金馬獎最佳男配角，今次入圍埋金像獎絕對係實力表現！
2. 秦沛
秦沛對上一次攞金像獎已經係1994年，憑新不了情攞最佳男配角獎！
3. 吳孟達
吳孟達幾年前做完心臟手術，已經好少拍戲，今次拍導火新聞線即刻入圍金像獎最佳男配角！
4. 姜皓文
今次係「黑仔」姜皓文從影以來，首次獲得金像獎提名！之前亦憑呢個角色獲得第23屆香港電影評論學會大獎最佳男演員提名！分分鐘黑馬跑出呀！
5. 廖啟智
智叔今次飾演沙田Band 5中學「基覺中學」的校長，並兼任棒球隊教練，帶領一班學生比賽，角色改編自真實的盧光輝校長。唔少人睇完都話夠晒熱血呀～
最佳女配角又係咩環境呢？
1. 方皓玟
小明憑呢套戲，之前已經入圍第23屆香港電影評論學會大獎，角逐最佳女演員獎！今次係佢首次入圍金像獎最佳女配角，唔知會唔會黑馬跑出呢？
2. 金燕玲
金燕玲可以話係今次女配角獎呼聲最高！佢上年已經憑踏血尋梅攞到同一個獎！今年呢個角色已經先為佢帶黎一座金馬獎最佳女配角獎，好大機會再下一城冧莊呀！
3. 張雨綺
星女郎張雨綺喺美人角入面飾演奸角，真係衰到貼地呀！小編睇果陣真係好唔鐘意佢，證明今次演得唔錯喎！
4. 廖子妤
呢個名你可能覺得好陌生，但係今次其實係佢第二次入圍最佳女配角架喇！對上一次係第33屆，憑末日派對呢部電影入圍！又係一匹黑馬呀！
5. Janice Man
近年JM主攻影壇，之前喺兇手還未睡入面擔正做女一，已經令導演同拍檔讚有潛質，又肯突破自己全裸上陣，今次憑寒戰II 入圍，唔知會唔會為佢奠定一個更好嘅基礎呢？
以上就係五大獎項嘅入圍名單，小編真係好想快啲知道啲獎項花落誰家呀！邊個係你地心水呢？
圖片來源: 網上
撰文: Msrachel
