【那年那事】2月14日 情人節快樂!

Rachel Kwok 13 Feb, 2017



 「2月14的約會~這個日子掛念誰~」2月14日情人節當然係掛念心愛嘅情人啦!情人節呢一日,情人都會互相送禮物比對方,單身嘅女仔就會送朱古力比心儀嘅男仔表明心意!
但係講到佢嘅由來都有幾個版本,當中最有名嘅講法就要數返去古羅馬時代喇~當年有個暴君(唔係率眾妖害人呀嗱!),為咗要充實兵力,竟然逼所有單身男人去從軍,唔准結婚!有個叫瓦倫丁(Valentine)嘅基督宗教修士無視禁令,秘密幫人證婚,結果被士兵拉咗仲喺2月14號被絞死啊 :(



為咗紀念佢嘅勇敢精神,後人就將每年嘅2月14號定為瓦倫丁紀念日,後來慢慢演變成為「情人節」。


據《世界圖書百科全書》資料指出:「在公元後200年時期,羅馬皇帝克勞狄二世禁止年輕男子結婚。他認為未婚男子可以成為更優良的士兵。名為瓦倫丁的教士違反了皇帝的命令,秘密為年輕男子主持婚禮,引起皇帝不滿,結果被收監,據說瓦倫丁於公元269年2月14日被處決。」


中世紀嘅情人節喺英國就最流行,佢地仲會將當地未婚男女嘅名分別寫喺紙條上面,然後分別裝喺唔同嘅盒入面。然後佢地就開始喺裝著異性姓名嘅盒度抽籤。抽到邊個個名就要同對方交換禮物。女方喺呢一年內就成為男方嘅「Valentine」。女方仲會喺對方衫袖上面繡上自己個名,照顧同埋保護女方就成為男方嘅神聖職責喇!聽落又幾浪漫喎!


至於點解會有羅馬神話嘅愛神邱比特喺在情人節相關物品出現,就係因為邱比特(拉丁文cupido,意思是慾望、愛)係羅馬愛神,相當於希臘愛神厄洛斯。傳說比佢手上弓箭射中嘅人都會幸福咁相愛架!


小編祝大家情人節快樂!


圖片來源:網上


撰文:Msrachel

聯 絡 我 們