林家棟喺1987年參加無線電視藝員訓練班第14期加入演藝圈，年代咁久遠，小編真係細細個就睇佢做戲架啦～唔翻查資料都唔知，原來佢同期有好多你估佢唔到嘅藝人架～
黃德斌
呢個都唔洗點介紹啦～而家仍然活躍於演藝圈，周不時都會喺TVB見到佢。黃德斌喺1988年開始由跑龍套做起，咁多年拍咗超過50幾套劇。最為人熟悉嘅應該就係佢喺《金枝慾孽》、《刀下留人》、《天與地》同《致命復活》入面嘅演出啦～
劉錫明
佢喺TVB嘅最後一套劇已經係1994年嘅《異度凶情》，之後就去咗大陸拍劇，大熱大陸劇《錦繡未央》都有佢份架～小編對佢嘅印象除咗拍劇外，佢仲係一個把聲好靚嘅歌手，佢最近一次出現喺TVB就係擔任《流行經典50強》嘅嘉賓，佢仲唱咗大家都耳熟能詳嘅《你怎麼捨得我難過》～近來TVB咁鐘意搵啲舊人返嚟拍劇，唔知會唔會考慮下劉錫明呢？
雷宇揚
一講雷宇揚就會諗起鬼王，原來佢都係林家棟同學仔嚟～雷宇揚嘅代表作一定非《陰陽路》系列莫屬，佢除咗拍戲外，佢亦係導演、監製同電台節目主持人，真係範範掂！BTW雷宇揚都有幫《怪獸公司》配音架，大家估唔估到係咩角色呢？答案就係………………………………………變色龍啦！
黎芷珊
大家應該唔會陌生，黎芷珊而家仍成日擔任主持嘅角色，但原來佢都拍過劇同出過唱片架～黎芷珊1985年仲出過一張日文碟，真係估佢唔到呀～佢仲同過好多男星拍過拖，最出名就一定係梁家輝、鄭伊健同陳小春啦～仲有另一樣估佢唔到嘅，就係佢姑丈係何鴻燊！如果小編姑丈係何鴻燊，我一定日日攤喺屋企做廢青～
當年TVB真係捧到好多好戲之人出嚟，希望嚟緊嘅日子TVB可以再創傳奇，為香港電影帶入更多新血啦～
圖片來源：網上
撰者：Kinnie
