喂！乜你都係80後、90後咩？咁你就一定食過以下零食！唔識嘅話，小編表示同情，亦都證明你絕對係無童年！
媽咪麵
記得次次食完媽咪麵都會喉嚨痛，但每次食完啲撈落麵嘅味精粉都即刻精神爽利！食到最尾仲要整闊啲個包裝口將剩咗嘅麵碎倒晒入個口度！爽呀！
旺旺燒米餅
通常啲人記得個廣告多過個旺旺燒米餅嘅味道！「媽，好辣呀！怕辣就食原味唔辣啦！」其實又係咪真係咁辣呀？唔好欺騙小編感情喎！
旺仔小饅頭
呢個又係同旺旺燒米餅差唔多時間推出，「旺仔、旺仔！旺仔小饅頭！」。一首用普通話唱嘅主題曲，唔知有無人仲記得呢？其實旺仔小饅頭嘅味道真係淡得嚟又有種特別嘅小饅頭味，佢咁嘅味又細細粒就成功成為我哋口痕拎嚟食嘅零食！
牛仔片
深刻嘅廣告，牛仔片就無啦！但係普遍80後、90後知道有牛仔片，都係喺學校小食部度見到之後先發現佢嘅好！一格格又有牛肉味，同埋食完之後係唔多覺得自己飽咗！成塊片輕飄飄咁！
戒指糖
諗返戒指糖呢個設計真係好有趣，其他嘅零食小編而加都會食，但戒指糖要帶落隻手指度食，小編表示現在嘅自己係絕對唔會再咁樣做！！！通常啲戒指糖都係勁甜，而我哋就好似食緊珍寶珠咁，舐下舐下！諗起以前食粒戒指糖起碼食超過一粒鐘先消滅到粒戒指，可能小編開始無乜童真，真係以前細細個先會覺得食戒指糖係得意！
魷魚絲
記得以前讀小學時，秋季大旅行就最鐘意帶魷魚絲！食完之後隻手又唔會好污糟，味道又唔係好咸，係旅行必備嘅零食！有時悶悶地拎下魷魚絲出嚟食下都唔錯架！
時興隆脆卷
呢個經典啦！有咖哩味又有辣味，買一包就有兩條，真係為食人恩物！記得當時同班嘅男同學好多時小息打完籃球之後都會買包時興隆脆卷嚟食！最重要嘅就梗係一條佢，就一條俾我啦！嘻嘻！
經典四洲泡泡可樂
小編最愛，小食部果陣時好似每粒賣5毫子或再平啲！其實食四洲泡泡可樂糖最重點嘅唔係喺一開始食果一兩分鐘，而係喺食到中間時，粒糖爆咗，然之後不斷索佢啲可樂味泡泡果刻先最正！
唔知仲有無其他懷舊零食，你哋係好鐘意食架呢？
圖片來源：網上
撰文：Gloria Leung
