相信好多有上開討論區嘅朋友都知道「連登」呢幾日七國咁亂，話說有網友喺連登開post，公開咗一眾喺IG搵食嘅兼職女友嘅Instagram 帳號。Post一出，花生格價格直線急升！
「PTGF」係咩？同援交有咩分別？
「PTGF」全名為Part Time Girl Friend。男網友會出錢同呢班兼職女友共渡幾個鐘嘅拍拖時光，有價有市，有時出一次街就可能有幾千蚊收入。呢份好搵過返工嘅工當然愈嚟愈多年輕女仔加入啦！唔通真係咁多人想搵返初戀嘅感覺？
PTGF 同援交其實係有分別嘅。大家都知道援交係會提供性服務，不過PTGF 強調嘅係自己可以畀到女朋友或者初戀嘅感覺客人，而且係會按照身體接觸嘅親蜜程度嚟收費，唔一定會提供性服務。由唔拖手凈行街到拖手、攬、KISS同上床價錢不同。另外PTGF 係可以問客人拎相揀客。
搵兼職女友同搵客主要都係喺主要會喺Instagram 進行，有興趣嘅人只要喺Instgram 搜尋 #ptgf、#hkptgf 等幾個hashtag 就可以搵到自己嘅目標。
呢班兼職女友首先會喺Instagram開個搵食帳號並post 出價錢表，大部份女仔都唔會公開自己嘅靚樣，不過佢哋會post出自己嘅局部性感照並加hashtag，有興趣嘅客人可以用DM (direct message) 聯絡、問對方拎相，及約去街。
有部份兼職女友真係當生意咁做，貼出客人好評。
與此同時，有部份男客人都會開個分身帳號，post相話自己想搵PTGF同提出有咩要求，自然會有女仔上門搵你。
「連登」發生咩事？
日前有位有位名為rubbishptgf_ 嘅網友，自稱曾經交過80個PTGF嘅佢就係連登開post，公開咗一眾喺IG搵食嘅兼職女友嘅Instagram 帳號，目的係要等大家知道邊個隱瞞男朋友「出嚟做」。出post 短短一個小時已經有3000千多個正評。呢位網友仲開埋Instagram 同大家分享搵食之道。
事態發展出乎大家預期，兼職女友合力反攻，公開一眾客人嘅相同商討價錢嘅對話圖。
有傳有男網友喺名單上發現自己女朋友張相，懷疑對方背住自己做PTGF，嘈到分手咁濟。雖然孰真孰假，現時都冇人可以確認到，不過一眾網友食花生就一定食得好開心囉！
圖片來源 : Instagram、lihkg、internet
撰文 : Amber
