上星期有成8套新戲，一日一套都睇唔切。好彩今個星期俾啲時間大家休息下，得4套新戲， 一於星期六日睇晒佢地！
1. 神劍亞瑟王（美國、澳洲）
亞瑟王係英國一個近乎神話嘅傳奇人物，佢嘅故事一定勁有故事性，加上今次拍攝用咗差唔多2億美金，所以畫面同特技一定會好精彩！
故事簡介：少年亞瑟嘅父親被殺，佢叔叔佛提岡奪去咗皇位。亞瑟被褫奪咗皇位繼承權，又唔知道自己真正身份，只好喺橫街陋巷中掙扎成長。但當佢由石頭拔出神劍之後，佢嘅人生就有翻天覆地嘅逆轉。
| {youtube}UZ4zFb62Et0{/youtube} |
2. 異形：聖約（美國）
呢套可以話係今個星期必睇！故事由《普羅米修斯》伸延，係《異形》系列前傳三部曲嘅第二章，直接同1979年首部《異形》函接，《異形》迷睇就一定架喇，但就算你未睇過前傳，剩係今集個故事都足以吸引你入場啊！IMDb有成8.3分，真係點都要入場睇一次啊！
故事簡介：殖民太空船「聖約號」，正前往浩瀚銀河系中一顆遙遠星球進行探索，船員喺個度發現一個好似天堂咁靚嘅地方，就唔知內裡危險重重，更有難以想像嘅恐懼和威脅！眾人為咗活命，即刻展開連串驚心動魄大逃亡！
| {youtube}o9qMAmZH1Ds{/youtube} |
3. 29+1（香港）
今個星期又有港產片喇～呢套戲已經搞咗好多場優先場，而口碑亦都十分之好！講就嚟30歲女人嘅故事，剩係睇trailer都覺得身同感受，到時入場一定勁有共鳴啊！
故事簡介：林若君，一個土生土長嘅典型香港都市女性。即將踏入「三字頭」嘅佢，開始擁有大部分同年女子憂慮：事業愛情家庭……種種不安突然來襲，更令她對三十歲感到前所未有嘅恐懼。黃天樂，同樣就三十歲嘅女生，但就過住完全唔同嘅生活，樂天知命，咩都唔諗唔煩，到底佢地兩個相遇會有咩火花？又會對對方生命有咩影響？
| {youtube}F8NuSFX-ltE{/youtube} |
4. 玩轉身後字（美國）
劇情有啲老土，外國影迷睇完就話呢套戲比較適合老人家睇。如果大家對呢類型片種有興趣都可以一試嘅～
故事簡介：退休女強人夏蕙係控制狂，連自己嘅訃聞點寫都要話晒事。但係年輕訃聞小編安安發現夏蕙臭名遠播，連最親近嘅人都對佢負評如潮。為咗幫夏蕙挽回名聲，於是就列出必做清單，要佢捉緊人生最後光景玩鋪勁！兩人相處之下，安安發現夏蕙不為人知嘅一面，仲同佢漸漸建立起忘年友誼。佢哋喺彼此身上搵番遺忘已久嘅生活熱情，不知不覺間改寫咗彼此嘅生命。
| {youtube}kj9KfLvJoNY{/youtube} |
今個星期得4套，如果睇唔啱仲可以睇返上星期啲戲，正啊！
圖片來源：網上
撰者：Kinnie
