有無諗過成年要接受一啲好殘酷嘅對待？以下所講嘅唔係返工供樓呢啲心靈殘酷，而真係一啲會傷害到你身體嘅肉體殘酷。
1. 努爾人
位於南蘇丹嘅努爾人，係當地第二大民族。小朋友成年當日，佢地會做一個叫「Gaar」嘅面部標記。男人通常會用刀喺額頭劃6條血痕，每條血痕都代表唔同嘅嘢，例如第一條就代表已經成年，第二條就係唔應該驚任何人。而女人通常就會喺額頭整啲圖案。由於佢地落手都比較重，所以啲疤痕都會跟佢地一世。平時俾紙界到都覺得痛嘅小編表示，真係睇相都覺得痛！
2. 薩塔瑞毛威族
巴西亞馬遜州嘅薩塔瑞毛威族人要俾子彈蟻咬10分鐘，仲要重複經歷20次先算成年。佢地首先要喺樹林執堆子彈蟻，放喺棕相葉手套入面，再放埋對手入去俾蟻咬。子彈蟻咬人個陣，釋放嘅毒素會切斷神經細胞間訊息傳遞，帶嚟全身麻痹同劇痛感，可持續24小時。由於被蟻咬一下嘅疼痛程度就好似被子彈射中一樣，所以被叫做子彈蟻。薩塔瑞毛威族人相信，未經歷過苦痛嘅人生就無意義，所以就要俾蟻咬下，確保佢地嘅人生有意義。
3. 喀麥隆
香港女人都想大胸，但非洲喀麥隆嘅女人就會強迫自己平胸。佢地認為平胸就可以避免強姦同其他性罪行。喀麥隆嘅女仔最細由10歲開始就會俾媽媽用滾燙嘅石頭熨平個胸，一啲比較有錢嘅家庭就會用彈性帶束胸。但因為衛生環境欠佳，好多女仔之後都會傷口感染，甚至失去生命。
4. 阿岡昆部落
位於加拿大嘅阿岡昆部落，佢地嘅成人儀式就係將參加成人禮嘅小朋友關入鐵籠20日，然後食一種叫做wysoccan嘅嘢，佢地相信可以消除童年記憶，因為佢地認為童年係懦弱嘅象徵，想成為真正嘅男人就必須要忘記童年。如果20日後佢地仲有記憶，咁就要再入去20日。但事實上，wysoccan係強力迷幻劑，唔單止會導致記憶喪失，而且副作用巨大，比如喪失語言功能、心悸、喪失運動能力甚至死亡。
5. 巴布亞新幾內亞
巴布亞新幾內亞入面嘅Sambians部落，男仔要接受好漫長嘅成年禮，佢地由7歲開始就唔可以再接觸女性，之後10年佢地仲要「將自己同媽媽嘅血分開」，佢地會射支箭去喉嚨或者舌頭，佢地相信咁就可以分開啲血，令佢地成為一個真正嘅大人。佢地仲要不停食甘蔗直到流鼻血、嘔吐，並且攝取長者嘅精液，以增加男性特質同地位。10年後成年禮結束，但佢地仍然會每個月流鼻血，就好似女人嘅月經咁。
6. 聖加布里埃爾達卡紹埃拉
呢個咁長名嘅地方位於巴西，當地女人一到青春期就要同其他女仔當眾打架，如果場面唔夠恐怖就要喺街裸露遊行，之後再毆打對方直至其中一方失去意識甚至死亡。最後勝出嘅一方就會被視為真正嘅女人，同一個值得娶嘅女人。
睇完以上嘅成人禮，只可以講身為香港人真係好幸福，到底呢啲反人性傳統幾時先會消失？
圖片來源：網上
撰者：Kinnie
