【蟻民K房】原來做過歌手？　轉型演員的TVB藝人

近年專注演戲嘅張繼聰最近獲邀參與啤酒節演出，對於自己能夠再站上舞台演唱感到好興奮。話時話，其實無綫都有唔少藝人都係歌手出身，都係唱得之人。好多觀眾都想聽多啲你哋唱歌架！

張繼聰：
過去曾被稱「謝生」嘅張繼聰於2005年以唱作歌手出道，寫過唔少膾炙人口嘅歌，當時更同張敬軒、王菀之及方大同被稱為「唱作四小強」。張繼聰最近自嘲自己嘅音樂事業好快已經玩完咗，自2013年推出專輯《X》後專注演戲。不過好彩轉型做演員後星途一凡風順，知名度大增！

王浩信：
早於2006年出道嘅王浩信，雖然當時唔算紅，但都唱過幾首為人熟悉嘅合唱歌，例如《拖字闕》、《愛與被愛》等。同唱片公司完咗3年唱片合約後轉投埋無綫，2013年更拎咗「飛躍進步男藝員」！喺啱啱播完嘅《不懂撒嬌的女人》中飾演嘅Saving 話題度十足，更成為香港唔少女性心目中嘅暖男。

蕭正楠：
2002年出道嘅蕭正楠當時人氣都唔差，不過自從佢喺一個頒獎典禮中，擊敗麥浚龍獲得男新人金獎時，當時意氣風發嘅蕭正楠講咗句「邪不能勝正」，成為眾矢之的嘅蕭正楠嘅事業就開始直線向下，之後佢選擇咗返大陸發展，到2008年回流簽約無綫做藝人。由低做起嘅蕭正楠幾經努力近年終於升呢成為一線小生。

陳展鵬：
好多人都知陳展鵬係由亞視轉投無綫，不過相信唔係好多人知道陳展鵬係歌手出身。陳展鵬1998年簽約唱片公司後推出過幾首單曲，唱功都唔錯架！

胡定欣：
喺劇集《城寨英雄》飾演陳展鵬伴侶嘅胡定欣原來一直都想做歌手，99年參加「全球華人新秀歌唱大賽」，更成為最後四強。為咗張試音合約，到2001年胡定欣又參加由無綫舉辨嘅《第3屆Cover Girl選舉》，勇奪全場總冠軍後加入藝員訓練班，正式展開演員之路。

田蕊妮
田蕊妮1993年參加亞視舉辦嘅歌唱比賽《未來偶像爭霸戰》奪冠後入行，不過入行唔係做歌手，而係做演員。直到13年老公杜汶澤將佢一邊化妝一邊演唱《沒那麽簡單》嘅影片post上網後好評如潮，更獲黃柏高Paco賞識重返樂壇，難怪唔少網友都話機會係留畀準備好嘅人，叫田蕊妮加油。

蔣志光：
喺唔少年輕人心目中蔣志光係一個演技出眾嘅演員，直到14年蔣志光喺電視劇《老表，你好Hea！》中演唱自創作品《相逢何必曾相識》，大家先知原來蔣志光係一個歌手。1986年出道嘅蔣志光唱過唔少名曲，可惜佢紅歌唔紅人，最後都係轉投無綫做「綠葉」。

曹永廉：
曹永廉1994年以歌手出道，於94至96年間曾推出三張個人專輯，可惜星運平平，到1998年簽約無綫做藝人，拍過幾十套劇。到最近主持《流行經典50強》至有機會再開金口。