近年韓國娛樂事業發展相當迅速，不同類型嘅電視節目都相當有創意又吸引，難怪成功引到一眾中國電視台瘋狂「抄考」啦！近年中國有不同節目被指出抄襲韓國節目，引發關注和討論。
自2012年湖南衛視購入MBC電視台綜藝《我是歌手》版權，節目大受歡迎後中國電視台開始關注韓國綜藝節目。中國過往都有唔少節目曾購買或得到韓方授權拍攝中國版，例如《Running Man》、《爸爸！我們去哪兒？》、《我是歌手》。不過自2014年中國政府限制電視台購買韓國節目版權後，中國電視台就開始大肆抄襲韓國節目。
據韓聯社報導，中國今年至少有7檔抄襲韓國嘅綜藝節目開播，包括近期因為「Hip-Pop Man」而引起大家熱論嘅《中國有嘻哈》，涉嫌抄襲韓國節目Mnet《Show Me The Money》。就等我哋盤點下近年被指抄襲嘅中國出品節目啦！
1. 《中國有嘻哈》抄襲《Show Me The Money》
《中國有嘻哈》自開播以嚟新聞多多，多個韓媒指出《中國有嘻哈》同Mnet 製作嘅《Show Me The Money》有好多位都好相似，例如節目Logo、舞台設計、節目內容編排等等都十分相似。就連節目其中一位導師張震嶽都表示：「節目不就是抄來抄去，學習本來就是一種模仿。」
兩個節目同樣送粗頸鏈予通過初選嘅選手。
2. 《中餐廳》抄襲《尹食堂》
湖南衛視嘅綜藝節目《中餐廳》被指同韓國tvN 出品《尹食堂》概念似到十足。《尹食堂》主要係呈現幾位主持於印尼峇裡島附近小島開設韓式餐廳嘅大小故事，播出後於韓國大受歡迎。播完冇耐後湖南衛視好快手咁拎咗個題材去拍《中餐廳》，同樣係藝人到其他國家開設中國餐廳，有冇咁巧合啊？
3. 《向往的生活》抄襲《一日三餐》
韓國tvN綜藝節目《一日三餐》係體驗自給自足生活嘅實境真人show。而由何炅、黃磊、「Super Junior-M」成員Henry主持嘅內地節目《向往的生活》，幾位主持前往鄉村體驗樸素生活，節目內容通通同《一日三餐》一模一樣。
4. 《我想和你唱》抄襲《Fantastic Duo》
湖南衛視出品嘅《我想和你唱》同韓國SBS 嘅《Fantastic Duo》題材好接近，都係明星同素人合唱嘅互動節目。雖然《我》總導演王琴表示節目冇抄襲，並話湖南衛視唔係第一次製作呢類型嘅節目，姐係暗示《我》係原創？咁信不信由你啦！
5. 《花樣好友記》抄襲《叢林的法則》
東方衛視嘅《花樣好友記》被指似足韓國SBS 嘅《叢林的法則》。旅行真人show《花樣好友記》係由吳彥祖領隊，聯同孫紅雷、彭于晏、馮德倫、劉燁等輕熟男一齊去到非洲展開一場野生冒險之旅，同《叢林的法則》相似於兩個節目都係去野外真人show。
6. 《極限挑戰》抄襲《無限挑戰》
雖然中國中央電視台曾經同韓國MBC 合作拍攝名為《了不起的挑戰》嘅中國版《無限挑戰》，不過東方衛視熱播出嘅《極限挑戰》同《無限挑戰》內容極度相似，不過卻從未向韓方購買過版權。
唔單只綜藝節目，連電視劇被指抄襲！最近開始拍攝嘅內地電視劇《我們的青春期》以80年代「高門台五家人」為背景，劇集人物設定、角色關係等等都同韓國電視台tvN 製作嘅《請回答1988》極度相似，引起不少劇迷不滿。
對於以上抄襲指控，好多內地網友都「幫理不幫親」，留言表示「感到好丟臉」。
圖片來源：sohu、Instagram、Internet
撰文：Amber
