【女朋友】男生最怕女生的七種特質

日本網站「みなの声」做咗個調查,要男性網友選出喺挑選女朋友時,最唔可以接受嘅特質。可能以下特質就係令到妳單身嘅原因啊!

第七位:太粗魯
大家都知日本男人好多都好大男人,有日本男網友表示接受唔到女朋友太man,粗魯又大動作。

第六位:成日抱怨、經常覺得自己唔快樂
為人悲觀唔係問題,大家可以藉住知識以及經驗去令自己嘅生活更精彩。不過成日呻自己有幾不幸、擺出一副世界末日咁嘅樣,咁消極嘅態度好難想像兩個人拍拖會有幾開心有趣。而且成日放負,只係會令身邊人都灰埋一份,何必呢?

第五位:只係對自己心儀對象體貼
雖然厚此薄彼嘅舉動係人之常情,不過日本人最重視團結,男網友們認為做人處事都必須顧慮所有人嘅想法,「大細超」係好唔成熟嘅行為,只會到大家尷尬!

第四位:公主病、自我中心
好多男人都好怕女朋友過於任性、只在乎自己嘅感受,完全唔顧及別人。男朋友因為愛妳至處處遷就妳嘅壞脾氣,不過成日要服侍公主相信男朋友都會好大壓力。

第三位:串、毒舌
可能妳認為開負面玩笑同人身攻擊只係「講下笑」,不過呢種另類幽默真係唔係人人可以接受到。

第二位:大洗又唔識理財
雖然話就話點洗錢係自己嘅自由,不過就長遠發展嚟講,當另一半花費毫無節制,一齊生活時經濟狀況往往都會互相影響,咁到時點算好呢......

第一位:衛生習慣太差
日本嘅網友認為一個女仔對自己都冇要求先會接受到唔衛生嘅習慣。甚至有網友表示當一個人自己嘅衛生都打理唔好時,其他方面仲可以有咩期望吖。

大家就算有以上嘅特質都唔洗太介懷,因為日本人係大男人啲㗎啦,對另一半諸多要求。不過同時都自己留意下啦,為咗自己以後嘅幸福,快啲改咗啲壞習慣啦!

Our website is protected by DMC Firewall!