小心中地雷!初次約會最唔適合問嘅7個問題

Amber So 28 Jul, 2017



約會嘅目的係令大家互相認識更多,不過第一次同心儀對象約會時心情難免會有啲緊張,好易問錯問題,早前韓國有網站列出7個初次約會最唔適合問嘅問題,各位約會時就小心唔好踩中地雷啦!



1. 你屋企人做咩架?
第一次同對方去街就「查家宅」會令人覺得「係咪貪圖啲咩」嘅感覺。


2. 你對我有咩睇法?
咁問對方可能會覺得太急進,令人感到壓力。



3. 你幾重?
體重係女仔嘅秘密,如果第一次同對方去街就問人幾重係一件好無禮貌嘅事,印象分立即扣到負分!


4. 你信咩宗教?
第一次約會應該講啲休閒有趣嘅話題好啲。如果同對方信仰唔同時,好容易會造成不必要嘅尷尬!


5. 政治立場係咩?
一開口就講政治有可能會令對方反感。而且第一次約會時唔適合討論嚴肅,正經嘅問題,討論期間更有可能會升級為罵交,影響大家關係。



6. 你人工幾多?
第一次約會就問對方人工呢啲咁私人嘅問題,就算你本人唔係有心,不過對方都會覺得你好物質、好現實。


7. 所有有關「前度」嘅問題
無論有幾好奇都唔好問人關於前度嘅問題!反正都過咗去啦,而且呢個問題有可能會令對方回想起同前度嘅傷心回憶,影響晒整個約會嘅氣氛又何必呢?


圖片來源:Internet
撰文:Amber

聯 絡 我 們