噚晚《降魔的》大結局馬國明飾演嘅小馬終於打贏咗展明同魔，本身萬眾期待嘅滅魔戲一節時間都無就玩完，真係見心姐嘅時間仲多過見魔啊！
由於《降魔的》低成本製作，本身都對最後大戰嘅CG無咩期望，點知最後真係勁兒戲，一槍就搞掂咗魔～
©TVB《降魔的》影片截圖
打完大佬就梗係又到感人時間喇，今次就到蔣志光上「奈何橋」。
©TVB《降魔的》影片截圖
對小馬一往情深嘅啤啤又點捨得走啊，好多網民都話佢唔走係咪舖緊第二季伏線，等啤啤可以做埋精靈同小馬一齊降魔伏妖。
©TVB《降魔的》影片截圖
可惜最後小馬同芷若都唔可以一齊，佢哋嘅關係真係完全錯晒timing，網民都話佢哋嘅關係就好似歌詞咁，「流星般閃過遙不可及的痛楚，如想不起我我都給你留座。從身邊經過場地或時候錯，我共你當中欠了什麼」。
©TVB《降魔的》影片截圖
©TVB《降魔的》影片截圖
©LIHKG
最後一幕有個疑似豪仔嘅人上咗小馬架的士，到底佢係邊個網民都眾說紛紜，但比較多人覺得其實佢係魔扮出嚟，因為之前魔講過佢會幻化成人思念嘅對像，而且石敢當著白色衫，而呢個疑似豪仔就著黑色衫，咁係咪亦代表呢個人就係魔鬼嘅化身呢～
©TVB《降魔的》影片截圖
有心水清網民仲發覺連對白都同魔一樣，咁睇嚟疑似豪仔好大機會係魔喎！如果TVB真係開續集，會唔會變成心姐（保護豪仔）同小馬（消滅魔）之爭呢～
©LIHKG
有網民仲好有心機組織晒未解釋嘅伏線，其實剩係個疑似豪仔同bonnie個魔胎，都已經夠開第二輯喇！
©LIHKG
雖然網民都想有續集，可以繼續睇小馬降魔，但佢哋亦都話好驚開續集TVB會亂咁塞啲捧緊嘅人入去，好似黃翠如、陳凱琳咁，好驚會破壞呢套神劇喎～
©LIHKG
©LIHKG
套劇咁快完小編同其他網民一樣都有啲空虛啊，即刻上網聽返首《遙不可及》先～
圖片及資料來源：TVB《降魔的》、LIHKG
撰者：Kinnie
