2018年係「超級英雄年」?盤點10部即將上映嘅超級英雄電影

超級英雄片可以話係票房保證,下年咁多套大家又最想睇邊套?

1.《黑豹》(Black Panther) 預計上映時間:2月16日

以黑人英雄為賣點嘅《黑豹》用咗大量非裔導演同演員,可以話係英雄片嘅一大突破,真係好期待啊!

劇情簡介:《黑豹》的故事將接續在《美國隊長3:英雄內戰》之後,帝查拉返回擁有先進科技卻與世隔絕的瓦干達接下王位。 然而積怨已久的宿敵再度出現,將他捲入一場波及瓦干達全國甚至全世界安危的巨大紛爭中,帝查拉身為國王和黑豹的勇氣和能力將受到最嚴峻的挑戰。

2. 《新異變人》(The New Mutants) 預計上映時間:4月13日

睇完宣傳片覺得呢套似恐怖片多過英雄片,唔知實際原片又會係點呢~

劇情簡介:5名有變種人能力的年輕人被限制自由,決定挺身對抗傷害並保護自己。

3. 《復仇者聯盟3:無限之戰》(Avengers: Infinity War) 預計上映時間:5月4日

呢條trailer一出即刻喺Facebook瘋傳!今次呢集集合咗史上最多Marvel超級英雄,2018年必睇啊!

4.《死侍2》(Deadpool 2) 預計上映時間:6月1日

第一集都咁搞笑抵死,第二集就梗係會食住上喇~唔知今次係咪都會俾電影審裁處定為三級呢~

5.《超人特攻隊2》(Incredibles 2) 預計上映時間:6月14日

久違14年終於出第二集喇!第一集主角一家都咁多花火,臨尾仲要生多個超人BB出嚟,真係好期待第二集啊!

6.《蟻俠2》(Ant-Man and the Wasp)預計上映時間:7月6日

2018年咁多續集又點少得蟻俠~今次Marvel話《蟻俠2》會成為佢哋第一部浪漫喜劇,係咪代表蟻俠會由偷零件賊變做偷心賊?

7.《毒魔》(Venom) 預計上映時間:10月5日

喺《蜘蛛俠》漫畫入面,Venom本身係隻外星生命體,主要以液態生存。佢到咗地球後可以寄生喺人類身上,大家熟悉嘅「黑蜘蛛俠」先出現。唔知今次呢個外傳會唔會有蜘蛛俠出現呢~

8. 《黑暗火鳳凰》(X-Men: Dark Phoenix) 預計上映時間:11月2日

黑暗火鳳凰其實喺《X戰警:最後戰役》就出現過,當時佢嘅能力強大到連X教授都無一倖免,可惜劇情太多漏洞而招致負評,所以最新版將著墨變種人嘅內心掙扎。

9. Untitled animated Spider-Man film預計上映時間:12月14日

今次呢套動畫電影嘅主角係繼承咗蜘蛛俠名號嘅第二代蜘蛛俠Miles Morales。

10.《水行俠》(Aquaman) 預計上映時間:12月21日

之前《正義聯盟》已經見過大家嘅水行俠下年將會有獨立電影,小編覺得佢喺《正義聯盟》嘅發揮麻麻,唔知喺自己獨立電影會唔會打得勁啲好睇啲呢~

下年咁多套超級英雄電影,大家真係要儲定錢喇!

圖片及資料來源:Deadline,IMDb
撰者:Kinnie

DMC Firewall is a Joomla Security extension!