今時今日睇大台啲演員嚟嚟去去都係嗰幾個，而且「無綫式」劇情真係令人連追都唔想追。眼見其他國家嘅電視劇主角後生演技又好，劇情又多元化，港劇真係好難追得上。不過想當年無綫都拍過青春劇—四葉草系列，當時搵咗好多演藝界新人出演，不時網上有傳一個「四葉草主角魔咒」，做過四葉草主角都唔會紅到......咁到底佢哋而家去晒邊呢？
四葉草系列有四輯，分別以唔同運動做主題，係四個不同故事，頭兩輯最受觀眾歡迎。
《當四葉草碰上劍尖時》
2003年播出嘅《當四葉草碰上劍尖時》係四葉草系列嘅第一輯，無綫罕有地拍攝青春學園劇，反應不俗。
黎諾懿
「神之馬壯」黎諾懿係劇中男主角，出演劇集後星途未見出眾，直至12年出演《愛·回家》後成功以馬壯一角跑出，生鬼演出令觀眾刮目相看。而私生活方面，黎諾懿14年與曾參選港姐嘅李潔瑩結婚，上年黎諾懿趁結婚兩周年向大家報喜訊，宣佈老婆懷孕，預產期為4月10號，太太隨時生得。
李逸朗
李逸朗當時仲係英皇旗下偶像歌手，同蔣雅文組成Don & Mandy後人氣不俗。其後轉戰內地賺人仔，15年回流返香港，以哭腔翻唱陳慧嫻經典歌曲《傻女》，以奇招爆紅。最近更加踩過界做埋內地網劇導，聽講內地反應唔錯！
李雨陽
劇中另一男主角李雨陽，2003年憑四葉草一劇出道，雖然演出機會不斷，可惜戲份唔多。2012年轉投HKTV，可惜HKTV不獲發牌，但佢堅拒回巢。之後李雨陽轉投飲食界，同朋友合資從事原味雞生意，越做越成功。
黃婉佩
當年劇中人氣最高嘅Race同家姐Rosanne 從新加坡嚟香港組成女子組合2R，2011年退出娛樂圈。16年年尾同新加坡富商David結婚，榮升做媽媽嘅Race 而家就留喺新加坡打理賣樓App生意。
唐詩詠
「最佳女朋友」唐詩詠當年都係以四葉草一劇出道，由當年至今都係大家心目中嘅女神。出演四葉草後唐詩詠演出機會不斷，2010年終獲「飛躍進步女藝員」獎。
《赤沙印記@四葉草.2》
第二輯《赤沙印記@四葉草》於2004年播出，以沙灘排球為題材。
司徒瑞祈
前香港游泳隊成員司徒瑞祈憑四葉草2一劇加入娛樂圈，當年嘅男神其後喺大台主持兒童節目。
蔡淇俊
當時被稱為翻版謝霆鋒嘅蔡淇俊最出名嘅當然就係同陳自瑤嘅一段情啦！曾被大台力捧，演出過處境劇《同事三分親》，可惜蔡淇俊冇咩觀眾緣，捧極唔紅。見娛樂圈發展麻麻，蔡淇俊近年轉做保險。
楊秀惠
喺第二輯咁多個主角當中得返楊秀惠一個仲喺大台有活躍演出。楊秀惠過往一向畀人印象係個只係識扮靚嘅花瓶，不過近期網友大讃佢嘅演出進步唔少，未來仲會喺無綫重頭劇《大帥哥》中飾演張衛健太太。
李思欣
李思欣11年與范振鋒結婚。參演過不同電視劇演出嘅李思欣，星途未見起色，到14年離開無綫後大搞珠寶生意，最近李思欣更表示打算開製作公司喎。
陳自瑤
陳自瑤由四葉女開始做起，開展星途。雖然星途一直浮浮沉沉，早年更流出裸露影片。12年同黃浩信結婚後專心做媽媽，只係間中拍攝劇集及同老公夫妻檔出席活動。
睇返又好似真係有魔咒喎，十居其九都紅唔起嘅......
圖片來源 : Internet
撰文 : Amber
