「美魔女」一詞係指一眾年過35歲，外貌仍然keep得好好，睇唔出真實年齡嘅美麗熟女。中港台三地都有好多風韻猶存嘅美魔女，而韓國「逆齡美魔女」金成鈴日前喺Instagram 貼出自己嘅生活照，引起網友們熱論。
韓國演員金成鈴日前喺Instagram 上載咗幾張自己嘅夏日穿著照。金成鈴喺圖中身穿貼身黑色上衣及牛仔短褲，露出修長美腿，完全睇唔出今年已經50歲！身為1988年第32屆韓國小姐冠軍嘅金成鈴，雖然已經係兩位小朋友嘅媽媽，但仍然保持住有如少女般嘅完美身材，加上保養得宜嘅外貌，真係好有氣質啊！網友留言大讃弗到爆嘅金成鈴似20歲多過50歲，不過佢自己就好謙虛咁表示「照片比真人好睇」。
大家係咪覺得金成鈴有啲熟口面呢？其實金成鈴出演過好多電視劇，最為人熟悉係喺《繼承者們》中飾演金嘆媽媽！早前佢都有客串《藍海傳說》，睽違3年同李敏鎬再次聚頭。
身為韓國著名美魔女，金成鈴不時都同上節目及喺訪問同大家分享自己嘅「凍齡秘訣」。呢位美魔女嘅外型及身材完全係靠自己努力堅持而來，佢接受訪問時表示自己每日都會做運動而且食好少。防曬係佢外出必備品，而且金成鈴會透過按摩嚟調節血液循環，增加皮膚彈性。
圖片來源 : Instagram @ sungryoung_kim
撰文 : Amber
