有無試過喺街見到啲藝人，明明好熟口面，但諗極都諗唔到佢個名？其實TVB啲綠葉都好有演技，甚至仲好過好多主角架～以下呢5個人，只要你有睇過TVB劇就一定見過，但佢地叫咩名你地又知唔知？
1. 楊證樺
佢由1997年加入TVB後，拍咗過百套劇，而小編最印象深刻就係佢喺《法證先鋒III》入面做管家，佢同胡楓個段主僕之情真係賺人熱淚啊！
唔講唔知，原來佢係1996年全球華人新秀歌唱大賽嘅美國紐約區冠軍，可惜加入咗TVB之後都無機會俾佢喺唱歌方面發展。仲有一樣估唔到嘅，大家知唔知佢老婆係邊個呢？唔知唔緊要，睇下相你就會「下，原來係佢」架喇～
無錯！就係佢喇！咁大家又知唔知佢叫咩名呢？同樣都係好熟口面嘅綠葉，佢叫沈可欣。唔知TVB會唔會考慮開套劇俾佢地兩個呢？
2. 湯俊明
係咪好熟口面呢？原來佢1994年已經開始拍劇，真係細細個就睇佢做戲啊～佢之前曾經過檔去HKTV，可惜最後開唔到台唯有返TVB。小編最鐘意佢嘅角色就係《大眾情性》入面做有易服僻嘅Nelson，表情動作真係一流啊！其實湯俊明都算高大靚仔啊，點解會紅唔起架呢？
3. 葉凱茵
啱啱大結局嘅《全職沒女》佢都有份架～原來佢係參加2002年嘅香港小姐而入行，仲同過李思捷拍拖～
咁多年佢咩類型角色都做過，你又最鐘意佢咩角色呢？
4. 邵卓堯
由1991年就開始拍劇嘅邵卓堯，10套有9套都係做壞人，甚至仲俾人話係「御用強姦犯」！
唔講唔知，原來佢初初入行做過電影男主角，套戲叫《小毛孩奪寶奇緣》，可惜票房唔好，加上又無其他好嘅演出機會，慢慢邵卓堯就由主角變做無咩人識嘅綠葉。
5. 李啟傑
喺演藝學院畢業之後就參加咗1997年無線電視藝員訓練班，跟住就開始佢嘅演戲生涯，佢咁多年做過好多唔同角色，但大部份都係連名都無，佢無做過啲咩令人深刻嘅角色，但你一定會認得佢個樣～
其實TVB仲有好多滄海遺珠，反正而家唔夠新人拍劇，不如試下俾多啲機會佢地啊～
