美女廚房除咗有明星煮嘢食，仲有一個叫「美少女廚神」嘅環節。你又記唔記得當年有邊個美少女廚神？
1. 賈曉晨（JJ）
大家一定識佢，但又知唔知原來佢係因為美少女廚神先加入娛樂圈？佢係《美女廚房》第一季嘅美少女廚神冠軍，之後就憑《味分高下》中嘅味之天使角色「梳打」走紅，上年仲嫁埋俾樊少皇～而家睇返當年嘅相，個樣都無點變啊～
2. 何佩瑜（Jeana）
Jeana係《美女廚房》第二季嘅美少女廚神參賽者，之後2010年就正式出道，仲出埋寫真添～大家對佢最有印象應該係《喜愛夜蒲》同《全職媽媽放大假》喇～
3. 龔茜彤
就咁聽個名可能唔知佢係邊個，睇埋相就一定知。無錯！佢就係樂瞳喇～樂瞳參加完美少女廚神之後，2007年就加入咗TVB，到而家仲不停拍緊劇架～
4. 袁家怡
呢個大家又知唔知係邊個呢？佢就係湯怡喇～因其外型同女藝人黎姿相似，所以被傳媒冠以「少女黎姿」形容，佢參加完美少女廚神就簽約成為英皇娛樂旗下藝人。
5. 陳嘉寶
原來「邦民女」都曾經做過美少女廚神架～睇返當年嘅相，同而家一樣咁清純可愛啊～
原來當年一個小小環節都發掘到咁多人～唔知佢哋而家睇返自己當年表現會有咩感覺呢？
圖片來源：網上
撰者：Kinnie
