小編對姚子羚最大嘅印象就係網民惡搞佢做「表哥」，睇完《同盟》先發覺原來佢除咗有樣有身材，仲好有演技架～今日就同大家一齊回顧吓佢嘅高質演出喇～
《當四葉草碰上劍尖時》（2003）
呢套簡直係小編嘅童年回憶啊！姚子羚飾演呆呆學生妹藍雪文，雖然唔係主角，但小編覺得佢係最可愛嗰個～題外話：四葉草系列第一集真係經典，希望TVB會繼續延續呢個系列培育新人喇～
《楝篤神探》（2004）
姚子羚係其中一個單元嘅主角，佢飾演一個信咗邪教嘅私鐘妹，角色深入民心到網民封佢為「邪教雞」！
而當時郭峰飾演嘅神棍喺劇中胸襲姚子羚一幕更引嚟網民瘋狂討論，可惜呢套劇之後演藝事業未有太大氣息。
《公主嫁到》（2010）
之後雖然姚子羚拍過好多套劇，但都未有一個好突出嘅機會俾佢表現自己。直至《公主嫁到》楚翹呢個角色令佢開始受人關注，好多網民都話佢扮妓女扮得入型入格，又唔顧形象醜化自己搞笑，仲慨嘆以佢嘅演技應該一早上一線～
《女警愛作戰》（2013）
今次姚子羚只會出現兩集，扮演一位反社會人格患者蘇星佩，但佢嘅精彩演出獲網民一致讚好，當佢喺劇中跳樓身亡嗰陣，網民仲問導演可唔可以開個外傳俾佢添～
《四個女仔三個BAR》（2015）
姚子羚仍然無機會做主角，但佢今次就飾演一位有婚外情嘅女強人，將女人又想追求浪漫但又想安穩嘅矛盾演譯得淋漓盡致，佢同劇中老公黃智賢嘅互動成為當時小編追劇嘅動力啊！姚子羚仲憑呢套劇喺《TVB 馬來西亞星光薈萃頒獎典禮2015》拎到「最喜愛TVB女配角」，佢嘅演技第一次得到獎項肯定！
《張保仔》（2015）
今次飾演炎貴妃嘅姚子羚帶少少邪氣，有貴妃嘅威嚴得嚟又有女人嘅溫柔，因為呢個咁複雜嘅角色，姚子羚仲喺《2015年萬千星輝頒獎典禮》得到「最佳女配角」！佢領獎嗰陣爆喊，就咁睇都feel到佢真係等咗呢個獎好多年！
《同盟》（2017）
去到而家播緊嘅《同盟》，唔洗小編講大家都睇到姚子羚有幾正喇！佢喺《同盟》入面打得又睇得，仲要同陳山聰有連場親熱戲，睇到小編都熱血沸騰啊！
唔知今年姚子羚又可唔可以憑《同盟》再下一城呢～
圖片來源：網上
撰者:Kinnie
