日本溫泉百選 3大必到溫泉

Kinnie Cheuk 20 Oct, 2017


去日本浸溫泉好似係必做之事,你哋又去過邊個溫泉呢~日本觀光經濟新聞之前就發表咗第30回日本溫泉百選,全部都係由日本專業旅遊者就溫泉氣氛、周邊地區充實度、溫泉泉質同當地鄉土食文化嚴選出嚟,以下3個大家又去過幾多個?


第一位: 草津
草津溫泉已經係連續第14年獲得溫泉百選第一位,最出名一定係呢個草津溫泉水嘅主要源頭「湯畑」。



呢啲大木箱係用嚟承接溫泉水流過留低嘅礦物質, 而且由於出水口湧出嘅溫泉溫度太高, 經過呢啲大木箱同埋導管,用自然冷卻將溫泉水輸送到湯畑週邊嘅各大小溫泉旅館溫泉池。



溫泉水冒出地面時溫度超過攝氏90度,離遠都已經聞到硫磺味。「湯畑」被商店街同溫泉旅館包圍住,喺舖頭買返隻溫泉蛋同溫泉饅頭,一路聞住硫磺味一路食,夠晒風味啊!



草津溫泉另一個出名嘅原因係佢夜景好靚,入秋5點幾就開始天黑,不妨買返支酒同朋友坐喺「湯畑」隔離吹下水,即刻疲勞盡消啊!



到達方法:
1.高速巴士:從新宿搭乘高速巴士前往草津溫泉,中途不需轉車 ( 約4小時,車資¥3600 )
2.JR:從JR上野站,搭乘JR特急-「草津」列車至「長野原草津口」站,再換乘「JR巴士關東」到草津溫泉 (約3小時,車資 ¥5970)
3.新幹線:從新幹線東京站 或 上野站,搭乘北陸新幹線到輕井澤站,再換乘草輕巴士到草津溫泉 (約2.5小時,車資 ¥8110)


第二位:別府八湯
別府八湯其實係別府市內8個極具代表性嘅溫泉地總稱,分別係「濱脇溫泉」、「別府溫泉」、「龜川溫泉」、「鐵輪溫泉」、「觀海寺溫泉」、「堀田溫泉」、「柴石溫泉」同「明礬溫泉」。



由於8個溫泉都相隔唔少距離,所以好少人可以一次過去晒8個。而最多人去同聽過嘅就係「別府溫泉」。「別府溫泉」每年4月都會舉行溫泉季祭典,好多遊客都會慕名而來架~



「鐵輪溫泉」亦係比較多遊客嘅地方,別府著名嘅「地獄巡遊」亦係集中喺呢一帶。



「觀海寺溫泉」就係八湯入面景觀最靚嘅一區,佢位於比較高海拔嘅地方,可以浸住溫泉望晒成個別府市嘅夜景~



到達方法:
1.JR特急ソニック(sonic):博多站→別府站(約2小時,全車指定席¥5560)
2.到達別府再搭公車去唔同嘅湯


第三位:指宿
指宿最出名就係熱砂溫泉,著住浴衣被埋喺利用高達80至90度硫磺溫泉加熱嘅砂堆入面,對於風濕痛、腰痛、關節痛、胃腸病、便秘、肥胖、全身美容都有效架~



砂樂溫泉會館係指宿市唯一指定嘅觀光天然砂蒸浴會館,由於好多遊客會嚟,所以職員都識少少英文同你溝通,唔識日文都唔洗驚~



著好浴衣就會有工作人員幫你鏟砂,埋幾耐由自己決定,但官方建議係10至15分鐘。夠鐘自己慢慢起身就得,之後仲可以入埋室內溫泉繼續浸,簡直係皇帝級享受啊!



到達方法:
1.JR 指宿枕崎線快車從西鹿兒島車站到指宿車站(約 1 小時)
2.在JR指宿枕崎線「指宿」站轉搭往 「山川桟橋」的鹿兒島交通公車約5分鍾,在「砂蒸會館前」(砂むし会館前)站下車,徒歩約1分鍾即可抵達。


如果以上呢3個都去過,不如挑戰埋剩返嗰97強啊~有興趣嘅可以去呢度睇吓:http://bit.ly/2yV0zFi


圖片及資料來源:網上
撰者:Kinnie

聯 絡 我 們