東鐵綫全線暫停，港鐵仲要年年加價，「有加冇減」機制令好多市民怨聲載道。但當香港人日日點閙港鐵都好，英國媒體Business Insider早幾日就大讚港鐵係世界頂級，當中仲有8大優點，究竟港鐵係外國人眼中又有咩好﹖作為香港人嘅你又認唔認同﹖
1. 整潔
Business Insider記者指，佢不論係喺朝早，晏晝定夜晚，即時係大時大節如聖誕節，港鐵車箱都係好乾淨，好少見到有垃圾。對比好多外國鐵路，成日見到一啲食物包裝同不同垃圾，記者覺得港鐵係好乾淨。
呢點小編都唔否認，去過歐美國家嘅朋友都知，好多地鐵都有陣臭味，相反港鐵算係乾淨，清潔都好密。
2. 平!
另外，英國記者指港鐵係「超平」。對比英國地鐵，港鐵平幾倍有多，加上用八達通仲有優惠。
呢點小編就有所保留啦。始終，唔同地方物價真係唔同，冇理由用英國價錢對比香港。
3. 安全
另一點英國記者讚港鐵就係個幕門。英國記者指大部分港鐵車站都有幕門，而倫敦地鐵咁多年來只有一條線係有幕門。除此之外，港鐵周圍都有好多安全指示嘅海報。
幕門呢樣嘢都係港鐵做得好嘅，當年要做幕門，好快大部分站都裝左。但安全呢件事就唔係裝個幕門就得，之前油麻地站未出現火花。
4. 排隊上車，少推撞
港鐵個個站都有排隊指示，左右兩邊排隊，中間留比人落車。英國記者指佢觀察所得，呢個方法好有效;相反英國曾經試過出「左上右落」，最後完全冇用。
你地又覺得呢樣係未真呢﹖
5. 聰明清楚嘅車站地圖
係港鐵車箱，有一個大家都見慣見熟嘅車站地圖，每個站都有燈表示之後係未站，你又喺邊個站。英國記者指呢個係簡單但極之聰明嘅設計，即使係外國人，一睇呢個圖都會好清楚自己位置。
小編就好認同呢點，港鐵呢個車站地圖設計的確清楚易明。
6. 指示清晰
除左上落車外，英國記者指港鐵指示好清晰，佢未試過有一次行錯路，去錯車站。對比好多外國鐵路，指示唔清楚，即使係當地人都會行錯。
7. 無障礙設施夠多
英國記者指港鐵站站都有無障礙設施，好似升降機，盲人指示等等。對比英國地鐵，只有好少車站有無障礙設施，港鐵係好disabled friendly。
8. 車箱多扶手
最後，港鐵車箱夠多扶手，冇位坐只要捉住扶手就冇問題。但好多外國地鐵都只係得好少扶手，好易會跌親。
就以上幾點，你地又認唔認同呢﹖不過我最想都係港鐵減下價。
