【1 蚊1 粒鐘】佛山商場推「共享男友」 幫手拎手袋兼陪行街

Yanica Chau 19 Jan, 2018


共享經濟最近喺世界各地盛行,好似汽車同住宿共享咁,都非常受民眾歡迎。不過最近內地好似已經將共享經濟發揮到淋漓盡致,喺佛山一個商場推出「共享男友」吸引人流,成功吸引大批女士。

喺商場入口處,安排咗幾位高大威猛嘅男士,佢地就係所謂嘅「男友」,商埸講明只需要掃QR CODE比1蚊或者猜包剪揼嬴咗,就可以使用依位男友1個鐘,「男友」嘅職責包括拎手袋、揀衫、幫手影相等貼心服務。
服務推出後,果然成功吸引大批人流,唔少行過嘅人都會停低圍觀。而且服務仲意外受歡迎,13號推出後,有唔少人都喺微信朋友圈分享,14號下午服務開始前,已經有唔少女士喺共享箱附近等候,準備體驗依個1小時男友。更有民眾專登由廣州去佛山體驗,現場女顧客就表示,覺得做法好新穎,所以就趕嚟試下。

由於「男友」顏值太高,唔少市民都要同佢地合照留念。仲有帶小朋友嚟行街嘅媽媽僱用「男友」幫佢睇住細路,佢表示咁先可以安心行街。而「共享男友」就話,過程中無遇到咩唔開心嘅事,顧客都好熱情,過程相當愉快。
不過依個服務14號已經完咗,但有商場職員表示,因為「共享男友」太受歡迎,以後會考慮再次推出依個服務。如果想體驗下記得密切留意!


資料來源:佛山新聞網 / 梨視頻


圖片來源:Youtube截圖


撰文:Yanica

聯 絡 我 們