Netflix除咗有劇集同電影外，仲有唔少受歡迎嘅動畫。Netflix上星期就喺動漫雜誌《Newtype》宣佈，將以3DCG技術重製經典作品《聖鬥士星矢》，預計2019年面世，並將於全球播出。
《聖鬥士星矢》係車田正美嘅代表作，屬於冒險類型嘅漫畫。故事講喺遙遠嘅神話時代，大地守護神雅典娜同想破壞人類生存空間嘅反派神展開連番大戰，一班正義人類就成為聖鬥士同雅典娜一齊並肩作戰，對抗反派。
Netflix宣佈會結合日本同美國製作團隊重製《聖鬥士星矢》動畫版，第一季會由「銀河戰爭篇」到「白銀聖鬥士篇」，總共12話，每集長30分鐘。動畫監督會由執導《CROSSANGE 天使與龍的輪舞》同《驅魔少年》嘅蘆野芳晴擔任；首席編劇係動畫版《復仇者聯盟》嘅編劇Joe Casey、Joe Jelly，而人物設計就由有份製作《JOJO的奇妙冒險》嘅西位輝實負責；岡崎能士負責聖衣設計，並由東映動畫製作。雖然聲優陣容仲未公開，但好多《聖鬥士星矢》粉絲都已經好期待呀！
官方海報見到星矢喺聖域向雅典娜效忠，呢幕真係勾起無數粉絲嘅回憶呀！睇嚟到正式開播嗰陣又可以瘋狂cap圖啦！
Netflix高層Greg Peters表示全球有過半數用戶會睇日本動漫，所以製作動漫可以幫佢地吸引更多用戶，聽落Netfilx嚟緊仲會繼續製作更多唔同嘅動畫喎～
圖片及資料來:シネマトゥデイ，Netflix
撰者:Yee
