美容陷阱嘅傳聞時不時都會聽到，所以為咗有保證啲，唔少顧客都會偏向選擇大公司，不過勢估唔到選擇大公司都有風險。有受害人向我地爆料，話自己幫襯開一間規模大、都算出名嘅美容公司，但估唔到對方短時間內一part當兩part咁做咗，咁就扣咗兩次療程，佢覺得簡直就係黑心美容院嘅呃人手法，完全不可接受！
受害人勞小姐表示，佢買咗一個總共提供8次服務嘅療程，喺佢準備接受第三次服務嘅時候，美容公司同佢講佢仲淨底5次療程，但明明佢之前只係去過兩次。美容院就解釋，因為上次先後同佢做咗兩個部位，所以就當兩次咁計。
勞小姐就覺得好唔合理，佢話的確係做咗兩個部位，但轉部位係美容師話因為佢背後比較嚴重，所以改做背後，其中一個部位只係蜻蜓點水式咁帶過。根本同無做無分別。而且明明一個療程係一個半鐘，果日雖然聲稱做咗兩個部位，但其實總時間都只係用咗一個半鐘，所以無理由咁就當兩次。而且仲比佢發現到，店員疑似有擅自改過佢做療程次數嘅文件，明明本身寫1，但職員加咗兩筆就變2，因為2字中間個位太筆直，所以好明顯喺比人改咗，職員擅自更改文件，依個行為都係不可接受。一次嘅療程就已經要4000蚊，勞小姐就覺得唔合理，覺得咁大個品牌，但同仿間黑店沿用嘅手法差唔多，所以不可接受。
騙徒手法層出不窮，除咗勞小姐嘅個案外，新聞亦不時見到好多美容騙局。例如美容院會揾啲靚仔靚女透過交友程式揾受害者，佢哋會先同受害者打好關係，到正式見面嗰陣就會揾藉口去美容院，再遊說對方買套票。
另外大家聽得最多就係會有人打俾你可以優惠價試做，點知上到去就會困獸鬥焗你俾錢。消委會之前就發表報告，關於美容預繳式消費嘅投訴上升咗82%；而關於美容套票過期同終止合約嘅投訴更加上升咗292%。有受害者表示本身係以$88優惠價試做，但之後就被遊說買30萬嘅套票，到簽完卡先癹現原來係簽咗100萬嘅帳單，仲要半年內用哂990次療程，即係要每日做5.5次療程先做得哂。
消委會就提醒大家要小心美容陷阱，去參加試用療程時亦避免帶信用卡同太多現金。
圖片來源：香港01、Topick、百度
撰者：Yanica, Yee
