開心食蛋糕，個人down要食蛋糕，唔知大家鍾意食咩蛋糕。最近CNN就統計出全球十大蛋糕，最估你唔到嘅係香港都榜上有名，即刻數俾你睇！
1. 意大利 Tiramisu
無錯，幾乎係人都試過嘅意大利Tiramisu，嗰種香軟甜滑嘅感覺，點止係美味咁簡單，直頭係幸福。
2. 德國 Black Forest Cake
德國有個叫黑森林嘅地方，盛產黑櫻桃，當地人會將黑櫻桃夾喺朱古力蛋糕入面，再搽奶油同灑上朱古力碎片，咁就整咗個黑森林櫻桃蛋糕嘞。之後傳傳下，就無用黑櫻桃，變成咗而家嘅朱古力蛋糕啦。
3. 美國 Cheese Cake
話就話芝士蛋糕起源於古羅馬，但係最好嘅芝士蛋糕一定喺美國！每間餐館都有自己特色嘅芝士蛋糕，自成一派；我地呢啲女人仔又點會唔一試傾心呢！
4. 馬來西亞/新加坡 Pandan Cake
斑蘭葉嘅“綠色”同佢“特殊嘅椰奶香”，令到呢個搶眼綠蛋糕成為新加坡必買手信。
5. 法國 Madeleines
佢嘅口感超吸引，鬆軟可口，味道香甜；外形重好鬼死誘人，底部焗時印出貝殼條紋，頂部中央拱起，成隻貝殼咁，外國人覺得好性感架！
6. 澳洲 Lamingtons
佢嘅出現其實係一單意外。話說澳洲總理林明頓先生嘅工人唔小心咁將佢最愛嘅海綿蛋糕倒咗落朱古力漿入面，佢又唔想丟咗啲蛋糕咁嘥，於是就叫人蘸上椰絲，以防蛋糕沾手。就係咁，偉大的澳洲名點就面世嘞。
7. 新西蘭 Pavlova
Pavlova係用蛋白酥做底，上面用草莓、奇異果同奶油做裝飾嘅蛋糕。聽講係為咗紀念前蘇聯芭蕾舞蹈家Anna Pavlova喺1920年代訪問澳、紐而發明嘅。由於容易整，佢喺澳紐兩國人民屋企成日出現架。
8. 香港 馬拉糕
上過茶樓飲茶嘅香港人都一定食過馬拉糕。啱啱蒸好嘅馬拉糕，揸上手熱辣辣，咬落口鬆軟彈牙，仲帶有微微嘅香味，真係引死人呀！
9. 奧地利 Kaiserschmarrn
奧地利聞名嘅〝皇家煎餅Kaiserschmarrn〞喺國王Joseph最喜歡的甜點。話說當時嘅廚師原本係整俾皇后Elisabeth食嘅，點知皇后無騷佢，反而Joseph就放咗入口，好食到不得了，仲賜埋KaiserSchmarrn個名俾佢。
10. 烏拉圭 Postre Chaja
傳聞話喺當地茶室老闆發明嘅，海綿蛋糕內層係桃肉，外層鋪上忌廉、鮮奶油、牛奶醬，食落好似泡沫一樣咁柔軟，仲充滿果香味。
圖片來源：互聯網
撰文：Irene Leung
