Weekend最好就梗係即刻飛去馬爾代夫享受下陽光與海灘啦！但係喺發夢都未咁早嘅情況下，去下香港又靚又舒服嘅好地方睇下日落，都係一個唔錯嘅選擇。希望今次可以俾大家多啲睇日落好地方嘅選擇。記住去睇日落之前，CHECK咗日落時間先，一陣miss咗就真係I am sorry啦！
尖沙咀海運大廈天台停車場
呢個地方正呀！Shopping完去尖沙咀碼頭果邊既海港城。再由海港城停車場上到去頂層露天停車場。一上到去！嘩！心曠神怡！即刻唔記得自己剛才大出血，咩煩惱都唔記得哂，感覺同自己個荷包一樣，輕飄飄！
荃灣渡輪碼頭
「誰令我能情深一片，令我輕柔如水清澈~」 我的心就如此屬於你。而親愛的你，究竟在哪裡遊走？令我只能每日捉著我的左手，對著它天天說心事！親愛的，你只要喺荃灣西地鐵站行一分鐘，就可以對著未來說愛你，找到你左手以外的另一半！
鯉魚門
力場無限好 woo woo woo~如果要去到鯉魚門，記得喺油塘地鐵站(鯉魚門廣場)搭小巴或者行到鯉魚門總站, 沿住海邊行十分鐘左右就會到。真係想大叫一句:「Holiday，我愛你呀！」
觀塘海濱花園
唔聽晨光第一線，都可以睇到日光最後一條線！要去觀塘海濱花園，最方便既梗係坐港鐵去到牛頭角站，喺B6出口出站，去到勵業街再步行多 10-15 分鐘就會到架啦！
西九龍海濱長廊
西九龍真係一個充滿文化氣息嘅地方！睇完啲乜乜戶外concert呀，吸收完啲藝術氣息，再拖住男朋友女朋友或隻狗嘅手由九龍地鐵站行十分鐘去到西九龍海濱長廊...嘩！你懂的！
東涌沙咀頭泥灘
你有無一部靚相機？無既話建議你即刻買番部！去沙咀頭泥灘無部專業相機嘅話，我建議你都係返轉頭留係屋企算啦！要去搵靚景嘅話就喺港鐵東涌站搭新大嶼山巴士38號(循環線)去到逸東邨，每日 05:30-00:24，每 3-6 分鐘一班，再喺逸東邨行 5-10 分鐘就到！美絕！
馬鞍山鳥溪沙
召喚沙田友馬鞍山友！你只要搭馬鐵去到馬鞍山站再去鳥溪沙青年村方向、雅典居對面入沙灘！不錯不錯！
元朗流浮山下白泥
「看天邊飄過雲海，告訴世界幻變常在~」 喺元朗市泰豐街搭33號 專線小巴 (每日05:00-21:30, 每 18-23 分鐘一班)，過咗流浮山迴旋處，就喺下白泥落車。要睇到靚靚日落可以喺下白泥深灣路同稔灣路交界嘅避車處。
小編而加執緊行李，準備搭飛機去馬爾代夫！你...繼續喺度睇日落啦:) Bye Bye!
圖片來源: 網上
撰文: Gloria Leung
