【點Jack回歸!】你知唔知每舊麥樂雞都有屬於自己嘅英文名?

各位麥當勞專家,你知唔知每舊麥樂雞都有屬於自己嘅英文名呢?加拿大麥當勞早前公開麥樂雞生產過程嘅片段。麥樂雞睇落好似舊舊唔同樣,但其實麥樂雞只係得四個形狀,仲有幫佢哋改名添!

大家食麥樂雞就食得多啦,你又有冇研究過麥樂雞嘅形狀呢?麥樂雞只係得四個形狀,分別為Bone(骨)、Bell(鐘)、Boot(靴)、Ball(波),全部都係B字頭。你又覺得似唔似?

有網友就問麥當勞點解麥樂雞只係得四個形狀呢?麥當勞發言人回應時表示「三種大少,五種太怪」,佢哋設計呢四個形係因為呢啲形狀可以讓大家最方便咁蘸到甜酸醬,而且有趣嘅形狀可以令小朋友食得更開心!

麥當勞公佈自今日 (4 月 13 日)起開始推出 18 件麥樂雞!今次點「Jack-gon」帶嚟兩款全新口味嘅Dip Dip醬,「韓式烤肉醬」及「檸檬香草醬」,連同最受歡迎嘅「蜜糖芥末醬」及「韓式辛辣醬」,一次過食到4款醬汁!而且今次仲用埋好可愛嘅 LINE FRIENDS 做包裝。

當小編默默的寫緊稿嘅時候,同事突然間變咗盒麥樂雞出嚟,立即變開箱文。個盒真係好可愛啊!

「專業食家」同事食評:麥樂雞就唔洗多講就一定好食架啦!而醬方面,除咗一向好味嘅蜜糖芥末醬之外,仲推檸檬香草醬!

同事表示檸檬香草醬好特別,「檸檬好檸檬,香草好香草」。食嘅時候會以為自己著住一條由檸檬同香草編織成嘅草裙,於夏威夷海灘翩翩起舞......總之就好食啦!(點織啊大佬......)(註:食家為男同事)

而韓式烤肉醬就比較失色啦,個名咁勁,根本就係頹飯黑椒汁,一百個失望。

大家又係時候去挑戰麥樂雞山啦!

圖片來源:Internet

撰文:Amber

 

DMC Firewall is developed by Dean Marshall Consultancy Ltd