【電影系列】外國輕鬆搞笑電影推介

一講起喜劇,大家一定會講周星馳,咁外國又有咩好笑到斷氣嘅高質喜劇呢?今日小編就推介5套外國輕鬆搞笑電影俾大家,包保大家笑足成個weekend!

1. Two Lottery Tickets/Doua Lozuri (玩死中獎三兄弟)
呢套係2016嘅羅馬尼亞戲,今年香港國際電影節都有上映。電影講三個男人中獎但唔見咗張彩票,喺羅馬尼亞已經創下當地票房紀錄,而香港電影節睇完嘅觀眾都話由頭笑到落尾!暫時仲未有香港片商買呢套戲,如果大家想睇就可以買碟或者上Youtube睇,但只有英文字幕。

2. Hangover (醉後大丈夫)

2009年嘅美國電影,相信好多香港人都睇過~故事圍繞四名好友,描述佢地喺其中一個朋友即將結婚前到拉斯維加斯舉辦男性單身派對,但由於狂歡酗酒過度,唔見咗準新郎嘅鬧劇。由於觀眾反應太好,導演之後仲出多兩套續集,但小編都係覺得第一集最好睇~

pp32366-the-hangover-poster-strips.jpg

3. The Nice Guys (黐筋雙晌炮)
2016年上映嘅美國懸疑犯罪動作喜劇片,故事設定喺1970年代嘅洛杉磯,敘述私家偵探受到極差脾氣嘅暴力拳擊手聘請,合作搵失蹤少女,但過程中又捲入色情片女星離奇死亡案件。呢套戲喺國內外都大受好評,可惜上年喺香港上映個陣只有好少戲院上,如果大家有興趣可以買碟返屋企慢慢睇,已經有中文字幕架喇~~

4. What We Do In The Shadows (低俗殭屍玩出征)
呢套大家應該有啲印象,因為當時搵咗鄭中基同杜汶澤配音。電影係講吸血殭屍偉哥、暴龍、灘叔同老爺係同居四人組,每日都想過「正常生活」,每晚都會瘋狂clubbing。陰差陽錯下,佢地識咗兩個人類,之後仲齊齊搏老命展開拯救人類大行動。小編原版同粵配都睇過,識睇就一定睇原裝版本嘅!不過留意返,呢套戲三級架,未滿18歲唔好話小編教壞你啊~

5. The Brothers Grimsby (特務大臨演)

2016年嘅英美合拍喜劇,IMDb只有6.2分,小編覺得呢套戲實在太痴線,痴線到好好笑XD故事敘述一個痴線英國足球流氓被迫同佢疏遠嘅軍情六處特務兄弟出任務,阻止恐怖份子對世界嘅威脅。香港無片商買呢套戲版權,但台灣上年已經上咗,所以大家可以上網搵中文字幕版。

the-brothers-grimsby-banner.jpg

以上5套係小編覺得百看不厭嘅喜劇,但世界上咁多戲,小編又點會睇得晒呢~如果大家知道其他好戲,記住分享俾小編知啊~~~

 

圖片來源:網上

撰者:Kinnie

DMC Firewall is developed by Dean Marshall Consultancy Ltd