香港去台灣個幾鐘就到，所以好多香港人一放假都會去台灣玩，貪佢夠平夠方便。次次都去台北台中好悶姐，新竹你地又去過未？其實新竹有好多隱世美景架～
1. 司馬庫斯
呢度被稱為「上帝的部落」，位於雪山山脈深處，係一個海拔1500公尺嘅泰雅族部落。司馬庫斯係全台灣最遲有電力同公路嘅地方，而且因為位置比較偏僻，所以而家仲未開發得太嚴重，如果真係想去就要趁早喇！
如果想去司馬庫斯，最好就自駕遊或者報local tour，因為個度係無火車同巴士架～如果由內灣出發，要坐4個幾鐘車先到，所以司馬庫斯最少都要留兩日一夜，而且入面嘅民宿唔算多，去之前記住要book好民宿啊！
2. 新豐紅樹林
位於新豐鄉青埔溪嘅紅樹林，設有多個觀景台同木棧道，影相打卡必到啊！加上大家可以見到好多彈塗魚、招潮蟹，順便嚟個生態遊都唔錯啊！溫馨提示：喺度睇夕陽一流，大家嚟之前記住check定日落時間啊～
話明隱世，交通就梗係唔方便喇～新豐紅樹林都係無火車同巴士直達，所以大家最好包架車去，咁就輕輕鬆鬆又唔洗轉車喇～
3. 山上人家
山上人家位於海拔1200公尺，可以俯瞰成個山林同雲海，加埋歐式建築，簡直靚到好似發夢咁啊！
其實佢係一間民宿，有埋餐廳，雖然附近無其他景點，但剩係呢個咁靚嘅景都夠影一日喇～不過都係個句，呢啲地方公共交通工具去唔到架～想去就要自駕或者坐的士喇～
睇相都咁靚，去到現場一定會靚到唔捨得走啊！小編建議大家可以包架車，咁就可以上車就瞓，落車就影相喇～
圖片來源：網上
撰者：Kinnie
