細細個就聽過「新線上遊戲地帶」個名，每日放學唯一嘅娛樂就係玩線上小遊戲，以下呢10個遊戲你地又有無玩過？
1. 香港茶餐廳
呢個遊戲係本地插畫師馬仔嘅作品，小編表示塊麵包成日都會黑晒ＴＴ
2. 終極超音鼠
呢隻game真係會上癮！不停死但又不停玩，其實有無人贏過？
3. 無個性戰隊
聽到個名啲回憶真係返晒嚟！過咗咁多年，小編仲係未夠蜜蜂大佬打……
4. 整蛋糕
剩係聽到呢三個字都會自動腦補埋之後嗰三個字，「整蛋糕俾男朋友」。其實呢個遊戲好白痴，但又唔知點解玩極唔厭～
5. 禁忌的戀人
每次老闆望過嚟，個心都真係離一離！最記得就係儲滿一個大心心之後就可以瘋狂咀咀，可惜小編從來未贏過，每次女主角都係跟佬走ＴＴ
6. 偷懶專家
小編玩呢個game好勁架，次次都唔會俾老細捉到，可惜現實就……我都係出返去做嘢先。
7. 掘金遊戲
無咩眼界嘅小編表示成日夾到石頭，連問號都係垃圾。呢個game玩法好簡單，仲每次都可以玩你半日。
8. 貓狗大戰
呢個二人遊戲真係好好玩，掟之前仲要計埋風向，好認真咁做啲無聊嘢～
9. 玩火遊戲
可以一至四人玩嘅遊戲，秘訣就係拎多啲道具，之後用炸彈圍住你個friend，咁佢就一定走唔到會死喇！
10. 敲高跟鞋
好考技術嘅遊戲，嗰陣小編一路玩一路諗點解會有人著啲咁奇怪嘅鞋出街，到大個咗先發覺原來更奇怪嘅都有……
係咪愈睇愈想玩呢？即刻俾個傳送門大家～
「新線上遊戲地帶」真係陪伴住大家成長，佢最後嘅update已經係2013年，童年啊ＴＴ
圖片來源：網上
撰者：Kinnie
