瑜伽唔一定專業人士先做到嘅，以下呢4個瑜伽動作，就算你柔軟度唔夠都做到架～不過當然，做嘅時候記住要量力而為喇～
1. 三角式
呢個電視賣廣告嗰陣可以做下，每邊維持大概15秒，做2至3次就得～
做法：對腳打開約兩個膊頭闊，雙手向兩邊舉起。記住手臂同膊頭要成一直線，對眼望住上面隻手手指就得喇～
用處：三角式可以放鬆條腰到肩頸嘅脊柱，舒緩背痛，仲可以令對腳更有線條添～
2. 眼鏡蛇式
呢個可以臨瞓或者每朝瞓醒嗰陣做，做完人都精神啲喇～
做法：俯臥喺地下，對腳打開到比膊頭寬少少，腳背貼地，手臂屈埋放喺胸部兩邊。呼氣嗰陣伸直手臂，抬起上半身，個頭向上仰，維持15至30秒就可以慢慢落返嚟。
用處：眼鏡蛇式可以舒緩背痛，亦可以令脊椎更有力，最最最重要，仲可以促進消化系統嘅血液循環同女性月經失調！一個咁簡單嘅動作就可以解決咁多問題，唔做就笨喇～
3. 牛面式
簡單到極嘅動作，就算平時喺office都做到啊～
做法：盤腿而坐，兩隻手交叉握住，拉到對手感覺到有啲扯扯嘅感覺就得喇～但記住唔好拉得太勁，如果唔係好易拉傷架～
用處：牛面式可以矯正高低肩嘅問題，加強背部肌肉，仲可以放鬆膊頭肌肉，啱晒每日都要坐office，成日都周身痛嘅人啊～
4. 駱駝式
最後呢個動作需要嘅柔軟度比較大，如果真係做唔到，記住唔好格硬嚟啊～
做法：跪喺地下，腳背貼地，上半身慢慢向後傾斜。手臂記住要同膊頭一樣闊，身體向後嗰陣對手捉住腳，如果捉唔到就盡量捉小腿。之後吸氣，再慢慢上返嚟，呢個動作做大概5次就得～
用處：駱駝式除咗可以改善駝背，仲可以減肚腩同刺激胸腺，令個胸部更豐滿同預防乳房下垂！嘩！呢個動作有晒大部份女人需要改善嘅問題，點可以唔學！？
雖然聽落就好簡單，但做起上嚟都有少少難度架～如果做唔到記住唔好勉強自己，慢慢就會做到架喇～大家加油喇！
圖片來源：網上
撰者：Kinnie
